Omukainhu vati a dipaa omulumenhu nekende lobiila

ν Festus Hamalwa

Omulumenhu weedula 30 okwa xulifa eshi vati a dengwa nokutuwa nekende lobiila komukainhu waye weedula 30.

Oshiningwanima osha ningwa mexuliloshivike kolukanda Omdele, modoolopa yaHenties Bay, efimbo lokeengulasha.

Nakufya okwa tongolwa oye James Tourob omukalimo wodoolopa ya Henties Bay.

Omupopiliko wopolifi omupedu komufala Kauna Shikwambi okwa koleka onghundana ei.

Opolifi oya hokolola tai ti ovaholafani ava okwa li tava tanguna ve li mobashu yavo.

Vati okudja opo omufekelwa ou okwa kufa ekende lobiila ndele ta denge omulumenhu waye.

Otaku hokololwa kutya eshi ekende lobiila la tatuka, omukainhu okwe li kufa po ndele vati ta tu omulumenhu waye monhulo.

Opolifi oya hokolola tai ti nakuninga oshihakanwa okwa ende oshinano shishona ndele te li denge po.

Okwa twalwa koshipangelo ashike ina fikako e na omwenyo shaashi okwa xulifila mondjila.

Omufekelwa okwa kwatwa po nota holoka momhangu nena.

Ota pangulilwa oshibofa shedipawo.

Opolifi oya kumaida ovaholafani opo va kale tava lopota pefimbo ngeenge tava ningilwa omahepeko molwaashi eshi otahi kwafele okukelela omadipawo.

Oshiningwanima shikwao, omulumenhu weedula 34 okwa xulifa eshi vati a tuwa nombele mexuliloshivike.

Otaku hokololwa kutya ovalumenhu ava vavali okwa li tava tanguna efimbo longula.

Okundja opo vati omufekelwa okwa ya keumbo laye ndele tadi ko nombele.

Opolifi oya ti nakuninga oshihakanwa okwa tuwa monhulo.

Okwa twalwa koshipangelo ashike okwa ina kako eshi a xulifila mondjila.

Omufekelwa okwa kwatwa po, ota pangulilwa oshibofa shedipawo.

[email protected]

The post Omukainhu vati a dipaa omulumenhu nekende lobiila appeared first on New Era.