Dad loo xiray dilka gabar 5 jir ah oo Meydkeeda laga helay Baydhabo

Gabar shan jir ah oo lagu magacaabi jiray Ikhlaas Ibraahim Aamiin, oo muddo laba maalmood ah ka maqneyd qoyskeeda, ayaa meydkeeda laga helay meel aad ugu dhow guriga qoyskeeda oo ku yaalla deegaanka Xaqsoor ee magaalada Baydhabo, Koonfur Galbeed Soomaaliya.

Ikhlaas ayaa la waayay abaare 2-dii duhurnimo ee Arbacadii, sida ay sheegeen ehelkeeda. Wixii xilligaas ka dambeeyay, ciidamada ammaanka ayaa magaalada Baydhabo iyo nawaaxigeeda ka waday baaritaanno iyo howlgallo lagu raadinayay gabadha.

Meydka gabadha ayaa la helay galinkii dambe ee Jimcihii, waxaana laga helay xarun caafimaad oo hooyada iyo dhallaanka ah, taas oo ku dheggan guriga qoyskeeda.

Booliska ayaa sheegay inay gacanta ku dhigeen saddex qof oo lala xiriirinayo baaritaanka dhacdada. Dadka la xiray waxaa ka mid ah laba haween ah iyo wiil dhalinyaro ah. Sarkaal boolis ah ayaa sheegay in mid ka mid ah dadka la xiray uu ahaa ilaalo ka shaqeynayay dhismaha xarunta caafimaad ee meydka gabadha laga helay.

Ilaa hadda, boolisku waxay sheegeen in dadkaasi ay ku jiraan baaritaan, balse aan si rasmi ah dacwad loogu soo oogin.

Ibraahim Maxamed Aamiin oo ka mid ah ehelka gabadha ayaa sheegay in markii qoysku ay heleen meydka Ikhlaas ay jirkeeda ku arkeen dhaawacyo ay u fasirteen in gabadha la garaacay, isla markaana xarig lagu ceejiyay.

Hase yeeshee, sheegashada qoyska weli ma aysan helin xaqiijin rasmi ah oo ka timid hay’adaha caafimaadka ama booliska. Mas’uuliyiintu sidoo kale weli ma shaacin natiijada baaritaanka caafimaad ee lagu sameeyay meydka.

Meydka Ikhlaas ayaa loo qaaday Isbitaalka Gobolka Bay, halkaas oo lagu sameynayo baaritaanno caafimaad iyo baaritaan meyd si loo ogaado sababta rasmiga ah ee dhimashadeeda.

Dhacdadan ayaa sidoo kale soo jiidatay faragelinta Hoggaamiyaha Koonfur Galbeed, Aadan Maxamed Nuur (Aadan Madoobe), kaas oo la sheegay inuu faray ciidamada booliska iyo hay’adaha sirdoonka inay si degdeg ah u baaraan dhacdada.

Sida uu sheegay sarkaal ka tirsan madaxtooyada Koonfur Galbeed, Aadan Madoobe wuxuu doonayaa in baaritaanka si degdeg ah loo soo gabagabeeyo, si loo ogaado waxa sababay geerida gabadha, loona xaqiijiyo cidda mas’uulka ka ah.

Booliska ayaa dhankooda sheegay in baaritaanku wali socdo, ayna isku dayayaan inay helaan dhammaan xogta ku saabsan goobta gabadha laga helay iyo dadkii laga yaabo inay xiriir la lahaayeen dhacdada.

Qoyska Ikhlaas ayaa ka mid ahaa qoysaska barakacayaasha ah ee bishii July loo raray guryo cusub oo laga dhisay deegaanka Xaqsoor ee Baydhabo.

Geerida gabadha ayaa walaac iyo murugo weyn ku abuurtay qoyska iyo bulshada deegaanka, iyadoo qoyska Ikhlaas ay dalbanayaan in baaritaan dhammeystiran lagu sameeyo dhacdada, lana caddeeyo sababta rasmiga ah ee dhimashada.

Waxay sidoo kale dalbanayaan in qof kasta oo baaritaanka lagu ogaado inuu ku lug lahaa falka loo soo qabto, dacwadna lagu soo oogo, lana horkeeno maxkamad, si qoyska iyo bulshada ay u helaan caddaalad.

Baaritaanka ayaa weli socda, waxaana la sugayaa natiijada baaritaanka caafimaad iyo xogta rasmiga ah ee hay’adaha ammaanka si loo ogaado sida ay dhab ahaan u dhacday geerida Ikhlaas.