Auleria Wakudumo

Epangero kalikandwirepo magano dona aga vana kara nago vantu gokutanta asi eyi vatulisapo mafano gokupitira monokompyuyuta (ID’S) egano lyedona ndi asi usatana vanakuretesapo. Ministera gweyi yomonda zosirongo Lucia Iipumbu katente asi mafano aga kwagaretesapo morwa kuwapukurura epopero ntani kuretesapo ewapukururo mokugava sirugana.

Epangero kalikandwirepo mahuyungo ogo vana kuhuyunga asi kuna hara vavaryuganese kweyi yopeke ndi sihonena nyue vana kugava sinonyiki. Mokugava nye mbudi mombongarero zanavenye sivike pita, Iipumbu katente asi ministeli zina didilike eyi vana kulitambayika mokupitira momagwanekero gonongodi omu vana kurwanesa eturo mosirugana soyikupuro ID’s kuruganesa egendeso. Mbudi ezi kazipwege morwa elyatero kalikereko momukunda gwaOmusati, omu vantu kavalyeterere morwa kapi vana hara elikwamo lyangesi, asi kuna kara nosilikidiso sefano lyousatana. Valyateli ava simpe kavageve sinka sawo sowoma mafano aga kuvhura vagaruganese koyininke yopeke ndi kwakuvagusa untu wawo wountu. Iipumbu katente asi epangero kwafumadeka elihameseromo lyovantu ntani kukarapo nye elikwamo lyoudemokoli, maliyongo gawo kuhamena mafano aga gomape gahepa kuliza nonokonda edi vana kugava kapisi monombudi dahana asi douhunga. Age katente asi Namibia kuna kutura malikwamo gendi kukwama omu yininke yina kukura mouzuni, yipo nose tusike pontambo oku vana kugendera vakwetu, paekeverero, nombudi dokuhasmena muntu ogo, kuna kuwapukurura mokugava sirugana, ntani elikwamo nye lyosirongo kuhamena kutura malikwamo monokompyuyuta.

Mokugwedako cabinet nare zapulisira eturo mosirugana mafano aga kuruganesa magwanekero gopanongodi eyi vatulire mosirugana kutunda mwaAugust 2023. ‘’ Mafano aga gikukara tupu monokompyuyuta kuna omu nye vapungura umbangi woge naunye nanayinye kuhamena komuntu ogo, muna hamene kugusa nonyara, efano lyomuntu nayimwe yina kara asi yokudimbwilisa muntu,’’ yimo ana kutanta. Iipumbu katente asi mafano aga, kwagatamburako paveta kukwama veta zokugwana mafano mosirongo kupitira moveta zokudimburura muntu omu nye nadigava mauzera kovatungimo omu vantu navamanguruka vagave nayinye kuhamena kwawo. Age simpoe katente asi vantu wovanzi kuna kara asi klapi vana divako Yuma, mafano aga twakara nago gosirongo ntani gaganye tuna kutura asi gomosystem. ‘’ Mafano aga vana kutumbura asi e-ID kuna kauretesapo ehuguvaro mokugwana sirugana popepi ntani kutara nye muntu ogo omu vamudiva, yimo ana kutunda ngoso. Apa nye ana kulimburura konombudi doyimpempa vana kulipa vantu, Iipumbu kayipatanesere nawa nawa asi egano lyomafano aga kapi gana kara asi kuna kukwama kwama vantu ndi asi vatare asi yinke vana kurugana monkarapamwe. ‘’ Kapi muna hamene asi ngapi navatura mosirugana koyiruganeso oyo. Age katente asi maruha unene gomuntu kwagatura mefano lyosirongo, unene nye eyi avaruganesa ngwendi kombanga ntani nomahina nye dononene domouzuni. Simpe kakandwirepo mahuyungo asi epangero kuna hara kupurakena ndi kutara asi nkenye muntu meparu lyendi yinke ana kurugana. Efano eli kapi lina kara asi kukeverera vantu ndi asi vadive eyi ono kurugana.

Age simpe katente asi ogu nye gwangesi kapi ana kuzuvha asi yinke yina kara mediveta, nountu womuntu ntani asi Namibia ngosirongo pwasene. Nye awo kuna kara nomagano asi vawapukurure ekeverero lyomuntu ntani kurerupika sirugana sawo.

The post Mafano gokupitira monomahina ID, kapisi usatana-Iipumbu appeared first on New Era.