Mwadhina Gwanembenge taka kala nefiku lomaudano

OSHAKATI- Ofikola Mwadhina Gwanembenge Combined School oye pyakidila nomalongekido okukala ya ninga efiku lomadauno taa kakala ko omafiku 25-27 Sepetemba neudo.

Ofikola ei oi li modoolopa yaShakati moshitukulwa shaShana noina ovanafikola ve hole okukufa ombinga moudano.

Eefikola da yooloka otadi indilwa opo di kale de li shangifa okukala da kufa ombinga moudano ou.

Omaudano aa otaa ka ningilwa kokapale kakula komaudano mOshakati osho yo kokapale kaUNAM mOshakati.

Omukulunhu pofikola Mwadhina Gwanembenge John Sheyavali okwa ti omaudano aa okwa fimana shaashi otaa eta ovanafikola va hangane pamwe okuhafela pamwe.

Okwa teelelika eefikola da yooloka okudja moshitukulwa shaShana nokoitukulwa ya yooloka tava di kufa ombinga komaudano aa.

“Osha fimana ngeenge ovanafikola novanyasha tava shakene navakwao okukondjifana momaudano shaashi etashi va kwafele va longife ounongo wavo,” ta ti.

Okwa weda po ta ti omaudano okwa fimana kovanafikola shaashi otaa kwafele eputuko lokaana ka kale ke na ohokwe yomaudano.

Okwa ti okutameka peendodo 4-7 otadi li shangifa koshimaliwa N$650. Omanga eendodo okudja 8-9 otadi li shangifa koshimaliwa shi fike N$850.

Sheyavali okwa ti eefikola tadi ka findana otadi ka pewa omaano omapapa, omakopi osho yo oshimaliwa keemuma.

Okwa ti osha fimana ngeenge ovadali tava tumu ovanafikola kopale ve uye vayambidide vakwao.

Okwa ti ovanafikola vamwe ova taalela omashongo ngaashi omidjalo domaudano neenghatu dokudjala mokapale nosho tuu oipumbiwa ya yooloka.

Okwa pula moshiwana ngaashi ovanangeshefa opo va yambidide eefikola noipumbiwa yomaudano unene tuu omatanga osho yo omidjalo.

–fhamalwa@nepc.com.na

The post Mwadhina Gwanembenge taka kala nefiku lomaudano appeared first on New Era.