U Rwanda na Chypre byasinye amasezerano y’ingendo zo mu kirere

U Rwanda na Chypre byashyize umukono ku masezerano y’ubwikorezi bwo mu kirere, agamije guteza imbere no koroshya ingendo zo mu kirere hagati y’ibihugu byombi.

Aya masezerano, azwi nka Air Services Agreement (ASA), yashyiriweho umukono i New York muri Leta Zunze Ubumwe za Amerika ku wa Kabiri, tariki ya 22 Nzeri 2026.

Yashyizweho umukono na Minisitiri w’Ububanyi n’Amahanga n’Ubutwererane Mpuzamahanga w’u Rwanda, Amb. Olivier J.P. Nduhungirehe, na Minisitiri w’Ububanyi n’Amahanga wa Chypre, Constantinos Kombos.

Aya masezerano aje mu rwego rwo kongera imikoranire hagati y’u Rwanda na Chypre, by’umwihariko mu bijyanye n’ubwikorezi bwo mu kirere, hagamijwe kurushaho guhuza ibihugu byombi.

Mu biganiro byahuje aba bayobozi, banaganiriye ku buryo bwo guteza imbere umubano n’ubufatanye hagati y’u Rwanda na Chypre, ndetse n’ibibazo birebana n’akarere n’ibiri ku rwego mpuzamahanga.

Guverinoma ya Chypre yatangaje ko aya masezerano azafasha mu guteza imbere imikoranire mu rwego rw’ubwikorezi bwo mu kirere hagati y’ibihugu byombi.

Aya masezerano ni indi ntambwe mu gushimangira umubano w’u Rwanda na Chypre no kwagura ubufatanye mu nzego zitandukanye.

Chypre ni igihugu cyo mu Burayi giherereye mu Burasirazuba bw’Inyanja ya Méditerranée. Umurwa mukuru wacyo ni Nicosia.

Minisitiri w’Ububanyi n’Amahanga w’u Rwanda, Olivier Nduhungirehe na mugenzi we wa Cyprus, Constantinos Kombos