Dagaalo qaraar oo Soomaalida & Oromada ku dhexmaraya Mooyaale

Wararka laga helayo magaalada Moyale ayaa sheegaya in saaka dagaallo ay ka socdaan saddex goobood, iyadoo xaaladda amni ee magaalada iyo deegaannada ku dhow ay kacsan tahay.

Sida ay sheegayaan wararka deegaanka, gudaha magaalada ciidamada Oromada ayaa la sheegay inay adeegsanayaan hubka culus, iyagoo hubka qaar ku rakibay dabaqyada dhismayaasha magaalada.

Dhanka kale, shacabka Soomaalida ee deegaanka ayaa weli iska difaacaya weerarrada, iyadoo xaaladdu ay keentay in dad badan oo rayid ah ay ka barakacaan magaalada, si ay uga badbaadaan colaadda iyo rasaasta ka socota goobaha dagaalka.

Dagaalladu kuma koobna gudaha magaalada Moyale oo keliya, waxaana sidoo kale la soo sheegayaa weerarro saaka lagu qaaday qabaleyaasha ku hareeraysan magaalada, oo uu ka mid yahay deegaanka Jumbuq.

Ilaa hadda, ma jiraan faahfaahin madax-bannaan oo lagu xaqiijiyay khasaaraha labada dhinac ama xaaladda guud ee goobaha dagaalka.

Wararka laga helayo magaalada Moyale ayaa sheegaya in dagaallada ka socda magaalada iyo deegaannada ku xeeran ay sii xoogeysanayaan, iyadoo ay iska horjeedaan dhinacyo ay kala taageerayaan ciidamada federaalka Itoobiya iyo ciidamada Liyu Boolis ee Dowlad Deegaanka Soomaalida.

Sida ay sheegayaan xogaha laga helayo deegaanka, dagaalka waxaa ka qeyb qaadanaya ciidamada federaalka Itoobiya oo la safan ciidamada Oromada, halka ciidamada Liyu Boolis ee Dowlad Deegaanka Soomaalida ay la safan yihiin Soomaalida ku sugan goobaha ay colaadaha ka socdaan.

Dagaallada ayaa la sheegay inay ka socdaan saddex goobood, oo ay ku jiraan gudaha magaalada Moyale iyo deegaanno kale oo ku dhow. Ciidamada Oromada ayaa la sheegay inay gudaha magaalada ku adeegsanayaan hub culus, iyadoo hubka qaar lagu rakibay dabaqyada dhismayaasha.

Wararka ayaa sidoo kale sheegaya in dagaallada ay ku burbureen ama ay gubteen guryo iyo dhismayaal badan, inkasta oo aan weli si madax-bannaan loo xaqiijin tirada dhismayaasha waxyeelladu gaartay iyo khasaaraha guud ee ka dhashay iska horimaadyada.

Dagaallada ayaa sababay barakac ballaaran, iyadoo kumannaan qoys ay ka qaxeen magaalada Moyale, una tallaabeen dhinaca xadka dalka Kenya, si ay uga badbaadaan colaadda iyo khatarta ka jirta deegaannada ay dagaalladu ka socdaan.

Barakaca shacabka ayaa muujinaya saameynta bani’aadannimo ee ay colaaddani ku yeelanayso dadka rayidka ah, kuwaas oo wajahaya xaalado adag oo la xiriira hoyga, cuntada, biyaha iyo helitaanka adeegyada aasaasiga ah.