Oshikonga shomatunilo epangelo shapitako onghela

Epangelo oku dilila kouminsteli wouhaku ola pitifa oshikonga shomatunhilo omukifi wokanghwenyenye oshoyo Opolio onghela.

Omukulunhu wouministeli wouhaku noukali nawa Penda Ithindi okwa lombwela oshiwana kutya ovadali otava indilwa va twalwe ounona vavo komatunhilo oshilongo ashishe.

Okwa twikila kutya matunhilo ota a yandjwa pavali, etunhilo loka mwenyenye oshoyo etunhilo lOpolio.

“Etunhilo lokanghwenyenye otwa tengeneka li yandjwe kounona okudja peemwedi hamano fiyo eedula o 10. Omanga etunhilo lOpolio tali yandjwa oku dja kounona vena oivike ili 14 fiyo opoivike 59,” ta ti.

Ithindi okwa yelifa kutya ounona ava vali va tunilwa nale oikando yadjako ina vapumbiwa naana vaetwe vali komatunilo, ndele omatunilo okwa nuninwa ashike ava vali va xupako.

“Elalakano oku fitika omwaka oo twali twafiyapo pokati opo oku dilila momatunhilo adjako,” ta ti.

Ithindi natango okwa yelifa oshiwana kutya elalakano loku yandja omatunhilo aa oku amena ounona komikifi da yooloka unene odo hadi kala dili mewangadjo.

Okwa twikila kutya omatunilo aa oha a kwafele oku nghonopaleka ovakwaita volutu, meni lomalutu ounona, nonande oku kale okuna etukuko lomukifi wonhumba, ovakwaita volutu meni lomalutu ounona alushe ohava hangika lela veli longekida.

Omatunilo aa natango okwa teelelika aka kale peenele ngaashi eefikola depangelo unene, eengeleka oshoyo eenhele odo unene hadi ningilwa oyoongelele ngaashi omatala omomikunda.

Ovadali otava indilwa vaete ounona vavo noukalata vavo voipangelo, opo ashike tava dulu oku didilika ouyelele uli mondjila oo vali ouli melandulafano.

Ouministeli wouhaku keshe odula ohau ningi oikonga yomatunilo oludi eli, opo idule oku kalekapo oundjolowele oshoyo oukolele wokanona okanamibia.

Oshikonga eshi natango ohashi yandje yoo omhito yoilonga kovapangi ava veli momaumbo vehena nande oyo oilonga yasha, opo vekeli monenepo ofilinga fimbo tava longo momatunilo.

[email protected]

The post Oshikonga shomatunilo epangelo shapitako onghela appeared first on New Era.