Aahingi yamwe yaYango otaya kotokele ookastoma

Ookastoma dhaYango mOvenduka otadhi nyenyeta nokupopya kutya aahingi yamwe otaya tokelitha owina omalweendo gokuthika mpoka puna kastoma opo ya mone ko oshimaliwa oshindji.

Yango olyo limwe lyomomahangano gokufelefula pashinanena moka kastoma ha ningi eindilo lyolefa pamakwatathano gopamalungula kongodhi [shoka hashi ithanwa kutya okoka-APP], nomeendelelo osheenditho ohashi thiki noku mu fala mpoka tayi.

Uuna oshihauto sha thiki ashike kastoma kepo natango pehala mpoka, nena oka-APP hoka kaYango oha ka tameke okugwedha ko kondando omanga omuhingi a tegelela.

Onkene ookastoma mongashingeyi otadhi popi kutya aahingi yaYango otaya kotokele ookastoma opo dhi fute oshimaliwa sha gwedhwa ko, taye shi ningi okupitila koka-APP.

Anuwa uuna kastoma a tula mo eindilo lyolefa nena omuhingi oha tokelitha owina koka-APP kutya kastoma okwa thiki polefa a tokelwa.

Pamulandu, uuna kastoma a ningi eindilo lyolefa yaYango nena Yango okwa tegelelwa a kale a thika pokastoma mbala muule wominute inaadhi konda pune, ashike aahingi yamwe ohaya tokelitha ethimbo lyokuthika mbala sigo opominute hetatu opo ya vule okufutitha ookastoma oshimaliwa shi li pombanda – medhina lyokutya kastoma okwa thiki posheenditho a lata.

Albertina Imalwa okwa holola enyenyeto lye konima sho a li a ningi eindilo lyolefa kuYango kooN$40.

“Sho nda ningi eindilo koka-APP kaYango, onda kala pongodhi yandje nda tega, sho ongodhi ya tseyithile ndje kutya olefa oya thika noya tegandje, ondayi etandi londo moYango.

Ashike onda nongele kutya koka-APP onkene taku ulike kutya oshihauto onkene sha tega ndje [nonande paushili onda londa nale tuli mela lyondjila],”osho a popi ngaaka.

Imalwa okwa gwedhapo kutya omukalo ngoka okuwete inaagu opala, molwashoka okwa li she eta ofuto yi londe okuya pooN$45, ano kwa gwedhwa ooN$5.

Oshimaliwa shoka sha gwedhwa ko, “Kashishi oshindji noonkondo, ashike pethimbo lyonkalo ndjika yoshikukuta, okashona hoka otaka vulu okweeta po sha,”osho Imalwa a popi ngaaka.

Okwa popi kutya keshi ngele omuhingi okwe shi ningile owina opo e mu kotokele ondando yi ye pombanda nenge pamwe ineshi ningila owina.

Ompupopiliko gwehangano lyaYango, Tulip Media, ina yamukula komapulo a pulwa konzokundaneki ndjika uunambo pethimbo sha tuminwa koshinyanyangidho.

Kastoma gulwe, ngoka a tseyika owala nedhina ‘Da Gracia’, okwa popi kutya okwa nongele kutya kokakalata ke kombaanga okwa kuthwa oshimaliwa omanga inaa londa olefa.

Okwa hokolola kutya omuhingi gwaYango okwa li u ulike kutya okwa thika nale nokwe mu tegelela pondje, ashike kokAPP okwa li taku ulike kutya natango olefa inayi thika.

“Okwa li nde mu tala kokaApp oku mu landula mpoka oshihauto tashi ende. Kali nande a thika mpoka ndili. Okwa li e li kokule natango nominute dhi li ne opo a thike pungame,”osho a popi ngaaka.

Da Gracia okwa popi kutya omuhingi kali natango e mu londeka moshihauto ashike okwa li nale a gandja elombwelo kokaApp kutya okwe mu londeka nokwe mu thikitha, nonande paushili [Da Gracia] kali natango a londa.

“Okwa yi noshimaliwa shandje shooN$18, dha kuthwa kokakalata kombaanga,”osho a popi ngaaka.

Kastoma gulwe ngoka a tindi edhina lye li tumbulwe okwa popi tati: “Ito tseya ngele okaAPP oha ka longo ngaa palandulathano, aahingi yooYango ohaya lundulula uuAPP.

Ohashi ende naanaa ngiini omuhingi a lundulule ehala mpoka puna okastoma kokaAPP?”

Ondando yaYango ohayi ikwatelele wo kuule woshinano mpoka kastoma tayi, konkalo yombepo, kompumbwe yoolefa pehala lyontumba – okutumbulapo owala yimwe.

Miilando ngaashi unene mOvenduka olefa ndjoka yopashinanena otayi dhana onkandangala omolwashoka oyendji oye wete yina egameno okuyelekanitha nootaxi.

Minista gwiilonga niiyenditho Veikko Nekundi oshiwike shika okwa popi kutya omahangano agehe gokufelefula gopashinena moNamibia otaga longo shaali paveta.

Sho a pulwa kutya omolwashike ge ethwa ga kale taga longo nokufelefula omanga kaage li paveta, minista okwa popi kutya iilonga yokukalekapo oveta oyi li momake gUuministili wIikwameni, Omatembu, Egameno nEpopilo lyoshigwana, omanga oshikumungu shopaungomba oshi li momake gUuministili wOmauyelele nOmakwatathano goPaungomba.

Nekundi muMei numvo okwa lombwele onzonkundaneki ndjika kutya Yango taka taalela oveta kuuministili womauyelele ngele okwa kala iniiyutha komilandu dhepitikilo lyokufelefula.

The post Aahingi yamwe yaYango otaya kotokele ookastoma appeared first on The Namibian.