Modeli ge !Gomenǁgams ǁga N$3miljuns ǁkhāsiba !kkōǂgā hâ ǁguiris ǀkha ge oasī

!GOMENǁGAMS – Model ǂûǂharugub ge Seagulls Malli, !Gomen-gams di ǁaegub ǂharugub !âb (CBD) !nâ ǂhanusise ǁîb daode ai!â ge ǂoa ge wekheb di Fraitaxtsēs ai ge ǁkhowa-am. Nēb ge !khaib ǂgurob ge nē ǂharuguba Pick n Pay ǀons !naka !oabade gere mā!nâba.

Nē ǀasa ǂharugub hîa Model Seagulls ti a ǂansab ge ǁaupexa N$33 miljunsa a ǁguiri!nâsa tsî sîsenīǁkhāsigu !ēde mā tsî !ā!nāsi ǂharugun tsî Namibiab !nâ kai ǀnōb !nâ xūna ra ǁamaxu ǂharugun tsîna ra ǂkhâ!nâ. Franziska Rüecks, dana direkters Modeli dis ge ge mî, ǁîn ǁamaxus ǂan-tsî-hō!âs hîa ǂganǀgaub ǁkhāsib ai a ǀnōsas, ǁama-aona harebasens, ǀasa xūna ǂgâxa-ūs tsî ǂgaoǀkhāsa ǀnōb ai ǁawoǁawosas ai a !gao!gaosa !khaisa. “Sida ge Modeli nî nē ǀhûhâsiba mâti nî mâǂoaba !khaisa gere ǁguiǂui, o gere mâǂoas ge, ǁama-aon sida din ǁaman ra !khaib tsî tarenan ǁnāpa ra hōs ǀkha nî ǂkhîǂâixa !khaisa,” tis ge ge mî.

NeModeli ge 70 sîsenaona !gaehâ ǁîna xun 29 nē a ǀasase. Naun ge ǀnai nau Modeli stordi tawa goro sîsen khoen tsî nē ǀkhāb ǁga ǀkhīs !aroma ge ǂganamsen tsî a ū1oahena. Disiǀgamǀa (12) khoen ge ǀnai ǁawosa sîsensoade ūhâ tsî !gaeǂgāhes ǀguisa ge dī. Nē ǂharugub ge !ē!nāsi ǂkhari tsî ǁaeguǀnōb ǂharugun ǀkhas tsî !âǀhuru-aosis !nâ ǂgâ hâ, ǂgaiǀons ai !khāde ǁamaxus, haiǂûn tsî !hanaǂûn tsî !ā!nāsise ra ǁkhamihe kofi-i !aroma.

!Gomen-ǁgams di !ā!khōmai-aob, Johannes Shimbilingab ge a mîs ge, nē ǀasa ǂharugub di ǁkhowa-ams, ǂgom!gâba !ā!nāsi sâuǁkhāsib !nâ ra ǁgau !khaisa. “Nēs ge ǂharuguba ǁkhowa-ams ai ǀgui hâ tama hâ, xawes ge nēsa ǁguiris, !ēde ǂnuwis tsî ǀomkhâis xa ra !hoa,” tib ge ge mî.

Ohlthaver & List (O&L) !Nans di dana sîsenǂuira mâisab Dr Even Thiemeb ge ge mî, nē ǁkhowa-ams ǂhâǂhâsasib hîa ǁguiris, ǀasa ǂâiǀgauga ǂgâxa-ūs tsî ǁama-aon di ǀkharaǀkharasa !âubasendi !oa unusens tsîna ra ǁgausa.

New Era Friday 30 October 2026

Page:8

Model Seagulls… ǀAsa Model ǁamaxu!khaib, !Gomenǁgams !nâ ge ǀhui-amheb.

The post Modeli ge !Gomenǁgams ǁga N$3miljuns ǁkhāsiba !kkōǂgā hâ ǁguiris ǀkha ge oasī appeared first on New Era.