Dowladda Soomaaliya oo ciidamo cusub dirtay degmada Baraawe

Dowladda Federaalka Soomaaliya ayaa lagu soo warramayaa inay qorsheyneyso in howlgallada milatari ee ka socda Koonfur Galbeed ay u weeciso magaalada Baraawe ee gobolka Shabeellaha Hoose, kadib dib-u-dhac ku yimid gulufkii ciidamada dowladda ee ku wajahnaa degmada Buurhakaba.

Wararka ayaa sheegaya in shalay magaalada Baraawe la geeyay laba cutub oo ka tirsan Guutada 21-aad ee Kumaandooska Gorgor, kuwaas oo qeyb ka ah diyaar-garow loogu jiro howlgal cusub oo milatari.

Dhanka kale, ciidamada Daraawiishta ee taabacsan Cabdicasiis Xasan Maxamed Laftagareen ayaa lagu soo warramayaa inay dhowr jiho uga soo dhaqaaqayaan Baraawe, taasoo sare u qaadaysa walaaca laga qabo in magaalada ay ka dhacaan iska horimaadyo milatari.

Labada dhinac ayaa wada dhaqdhaqaaqyo ciidan oo la xiriira loollanka siyaasadeed iyo gacan-ku-haynta deegaannada Koonfur Galbeed. Ciidamada taabacsan Laftagareen ayaa sidoo kale wada howlgallo ay ku doonayaan inay ku xoojiyaan awooddooda dhulka.

Wararka ayaa intaa ku daraya in labada dhinac ay taageero ka helayaan dowlado shisheeye, inkastoo aan si madax-bannaan loo xaqiijin nooca iyo baaxadda taageerada la sheegay.

Dowladda Federaalka ayaa sidoo kale ciidamada taabacsan Laftagareen ku eedeysay inay xiriir la leeyihiin Al-Shabaab, eedeymahaas oo aan weli si madax-bannaan loo xaqiijin.

Dhaqdhaqaaqyada milatari ee labada dhinac ayaa muujinaya in Baraawe ay noqon karto goob muhiim ah oo uu ka sii xoogeysan karo loollanka siyaasadeed iyo amni ee Koonfur Galbeed, iyadoo xaaladda gobolka ay weli tahay mid isbeddelaysa.