Shiinaha iyo Jabuuti oo si wadajir ah u diiday in aqoonsi loo raadiyo Somaliland.

Shiinaha iyo Jabuuti ayaa mar kale xaqiijiyey taageerada ay u hayaan madax-bannaanida, midnimada iyo wadajirka dhuleed ee Soomaaliya, iyagoo si cad uga soo horjeestay dadaal kasta oo Somaliland loogu raadinayo aqoonsi dal madax-bannaan.

Mowqifkan ayaa lagu sheegay bayaan wadajir ah oo kasoo baxay kulan magaalada Beijing ku dhexmaray Wasiirka Arrimaha Dibadda Shiinaha Wang Yi iyo dhiggiisa Jabuuti, Cabdulqaadir Xuseen Cumar, kuwaas oo 21-kii October yeeshay wada-hadallo ku saabsan xiriirka labada dal iyo arrimaha gobolka.

“Labada dhinac waxay si adag u taageerayaan Soomaaliya inay difaacato madax-bannaanideeda iyo wadajirkeeda dhuleed, waxayna ka soo horjeedaan isku day kasta oo Somaliland loogu raadinayo ‘aqoonsi diblomaasiyadeed’,” ayaa lagu yiri bayaanka wadajirka ah.

Labada dowladood ayaa sidoo kale caddeeyey in Somaliland ay weli qayb ka tahay Soomaaliya, iyagoo bayaanka ku sheegay inay tahay “qayb aan laga goyn karin Jamhuuriyadda Federaalka Soomaaliya”.

Dhanka kale, Shiinaha iyo Jabuuti waxay ka soo horjeesteen iskaashi kasta oo rasmi ah oo dhex mara Somaliland iyo Taiwan. Intii uu socday kulanka, Jabuuti waxay dib u xaqiijisay sida ay uga go’an tahay mabda’a “Hal Shiinaha”, halka Wang Yi uu ku ammaanay Jabuuti taageerada ay Beijing ka siiso arrimaha uu Shiinuhu u arko danihiisa aasaasiga ah.

Mowqifka labada dal ayaa kusoo beegmaya xilli dowladda Soomaaliya ay si weyn uga hortagayso dadaallada lagu doonayo in Somaliland loo aqoonsado dal madax-bannaan, gaar ahaan kaddib markii Israa’iil ay 26-kii December 2025 noqotay dalkii ugu horreeyey ee aqoonsada Somaliland tan iyo markii ay ku dhawaaqday inay Soomaaliya ka go’day 1991.

Dowladda Soomaaliya iyo Midowga Afrika ayaa diiday aqoonsigaas, halka IGAD ay sheegtay in aqoonsi hal dhinac ah uu ka hor imanayo mabaadi’da iyo heshiisyada caalamiga ah ee lagu ilaaliyo midnimada iyo madaxbannaanida dalalka.

Inkasta oo Somaliland ay tan iyo 1991 yeelatay hay’ado maamul, siyaasadeed iyo amni oo u gaar ah, dowladda federaalka Soomaaliya waxay weli ku adkeysanaysaa in Somaliland ay tahay qayb ka mid ah Soomaaliya, isla markaana aan maamulkeeda loo aqoonsan karin inuu yahay dowlad madax-bannaan.