Epangelo la yandja omalukalwa mOnandjaba

Epangelo ola yandja omaumbo a fika po99 kovanhu ovo ve na oyuuyemo ili pedu mOnandjaba moshitukulwa shaMusati. Minista womayambulepo edoolopa nomikunda James Sankwasa okwa holola kutya okukala una eumbo oshinima sha fimana. Ta ti eumbo oha li lundulula onghalamwenyo yomunhu, okukala wuudite owuumbo, okuongaleka ovakwapata voye popepi nokuyandja ombili yokomwenyo.

“Nena ita tu yandje ashike omatungo ndele ohatu yandje eeshapi, eameno nohokwe movakwashiwana,” Sankwasa ta holola ngaho.

Okwa ti eumbo olo olukalwa lovakwanedimo, va kale va amenwa, ounona veli honge osho yo omidingonoko di xume komesho. Minista okwa weda po ta ti epangelo natango ota li twikile nokulonga leli tula mo nokukwashilipaleka kutya keshe omukwashiwana okuna eumbo lili pomufika wa amenwa.

Sankwasa okwa pandula ehangano loNamibia Housing Company osho yo ovakalimo vomOnandjaba eshi veva pitika opo va tungilwe omalukalwa avo.

Minista okwa pandula yo ehangano loStandard Bank Namibia nomahangano akwao a wedwa po eshi a longela kumwe naye opo va kale va eta po omaumbo aa.

Okwa ti ovanhu ava va mona omauwa aa navo ova kufa ombinga mokukwafela eshi veli manga oukuni kumwe nokukala va ongela okamaliwa osho yo okututa eedopi, okufa omalambo okuya ominino, tava tula mo ominino medu nokututa omadu okutunga omalukalwa aa.

Minista okwa holola kutya elongelo kumwe loshiwana, ovatungi vomaumbo osho yo ouministeli ola ninga oilonga e i ipu noya endelelwa po mepafimo leisho.

Sankwasa okwa pandula vali kasela womoshikandjohoololo eshi a longela kutya novakalimo vomOgongo, Onesi, nOnandjaba opo va tunge omaumbo a fika po15 momidongonoko davo.

Okwa ti elandulafano eli lali pokati kepangelo, elelo, omahangano noiputudilo ola fimana opo va kale va kandulepo omhumbwe yomaumbo moshiwana.

Okwa ti ehangano lokutunga omaumbo ola totwa po momudo 200o. Oha li tungu omaumbo koitukulwa aishe moshilongo. Fiyo opapa, ehangano ola tunga omaumbo a fika po11 000.

Sankwasa okwa ti epangelo ola ninga yo onghendabala ya wedwa po eshi la yandja eemiliona N$27.8 kehangano lokutunga omaumbo loShack Dwellers Foundation opo ku tungwe omaumbo taa tengenekwa e li po7 282.

Sha landula eshi ovanhu vahapu va kala nokukwena shaashi veli momhumbwe yomaumbo, epangelo ola holola kutya ota li longo la tula ombuda moshixwa opo li kandule po nokuxwepopaleka omhumbwe yomaumbo moNamibia.

Minista okwa weda po ta ti ouministeli owa tula poshitaafula natango eemiliona N$26 opo ku yambulwe po omalukanda nokuyandja omakwafo oo a pumbiwa kovakwashiwana ngaashi omeva, olusheno, oudjuwo, oumainolo naikwao ihapu.

Okwa kumaida oonakupewa omaumbo opo ve a kwate nawa, va kale ve na omaumbo a yela osho yo okukala nombili novashiinda vavo. Okwa kumaida natango ovo inava mona omaumbo opo va tote po eengudu dokuongela oshimaliwa opo navo va dule okutungilwa omaumbo.

Okwa ifana oikondo yopaumwene novanangeshefa opo va kwafele okutungila ovanhu ovo ve na oyeeyemo ili

Sankwasa okwa kwashilipaleka kutya epangelo ota li twikile okulonga noudiinini opo li kandule po omhumbwe yomaumbo moshilongo nokukwashilipaleka kutya ovanhu aveshe ova mona omaumbo.

[email protected]

The post Epangelo la yandja omalukalwa mOnandjaba appeared first on New Era.