Onopa yomeva poShingunguma otai kufwa po

SHINGUNGUMA- Onopa oyo kwa li ya tulwa momeva mondjila yokuya kofikola ya Shingunguma Primary pefimbo lodula otai ka kufwa po molwaashi otai kala i vakwe po koshiwana osho yo okutewa po.

Edi oda popiwa kuKansela woshikandjohoololo Ongenga Josef Nenghwanya pefimbo a ninga eenghundafana naKundana onghela.

Neudo pefimbo lodula ofikola e i okwa li i li koshi yomeva molwomuloka ou wa li muhapu osho yo omeva amwe po oo kwa li taa di moAngola.

Ovanafikola okwa li ve li komaumbo molwaashi ondjila okwa li i li koshi yomeva osho yo okulela ovanafikola vaha ninge oihakanwa yokuwila momeva. Onopa oyo okwa li ya tulwa po kuminista woilonga noyeendifo Veikko Nekundi melongelokumwe nombelewa yaNgoloneya waHangwena Kadiva Hamutumwa osho yo ombelewa yomukulunhuwiliki wehongo.

Konima eshi onopa ya tulwa po, ovanafikola novahongifikola okwa li hava ende kombada yonopa vau ka keetundi. Kansela okwa yelifa ta ti onopa oyo otai ka tuvikilwa kongulu i li kOshikango oko haku tulwa oinima yombelewa yoshitukulwa. “Onopa ova fimana shaashi natango otava dulu okulongifwa momudo tau ya ngeenge ondjila e i natango ya talama omeva,” ta ti.

Okwa yelifa ta ti ovanhu ova tameka nale Omaandaxa okukala va kufa po ounopa. “Itashi ti kutya onopa otai ka longifwa ashike pofikola Shingunguma momudo tau ya ndele natango otava dulu okulongifwa keefikola vali dimwe po odo tadi ke li hanga di li koshi yomeva,” ta ti. Nenghwanya okwa ti osha fimana ngeenge omaliko epangelo taa kwatwa nawa opo a dule okulongifwa vali komido da landula ko.

Okwa pandula oshiwana eshi she li umbata nawa ina shi ningila ounopa ava ominyonena.

*-fhamalwa@nepc.com.na *

The post Onopa yomeva poShingunguma otai kufwa po appeared first on New Era.