OUTAPI- Omupopiliko weumbo lopashiwana Saara Kuugongelwa-Amadhila okwa talela po oshipangelo shaUtapi mwa kwatelwa onhele yewalanda nelalakano lokudidilika omashongo oo a taalelwa kovanaudu.

Kuugongelwa-Amadhila, Omaandaxa natango okwa li a talela po endiki lopaungomba li li modoolopa yaUtapi omo a twa ovanafikola omukumo ve li honge nondjungu.

Okwa popya ta ti oshi li oshitopolwa shombelewa yaye okukala a talela po oipangelo ya yooloka moshilongo osho yo endiki louhaku.

Elelowiliki loshipangelo ola lombwela Kuugongelwa-Amadhila kombinga yomashongo a taalelwa koshipangelo ngaashi omwaalu muhapu wovanhu tava kwa twa komalaria.

Okwa lombwelwa kutya neudo okwa lopotwa ovanhu 34 va kwatwa koshidu shamalaria.

Natango, okwa shiivifilwa kutya oshipangelo osha taalela eshongo linene lovanhu tava di poushiindashilongo koAngola tava monika malaria.

Okwa didilikwa oipangelo ei i li kombinga yokeengaba ngaashi Engela shi li moshitukulwa shaHangwena noshipangelo shaUtapi unene hai yandje omayakulo ouhaku kovanhu tava di koAngola.

Ngeenge owai koipangelo ei ivali natango oto hange ko omwaalu muhapu woomeme ve li momateelelo veu ya okuteelela okupulumuna moNamibia.

Kuugongelwa-Amadhila okwa yelifa ta ti ombelewa yaye oya didilika omashongo a taalelwa koipangelo.

“Ouministeli wouhaku pamwe nepangelo otau twikile okulonga nondjungu okukwashipaleka kutya omashongo oo e li koipangelo otaa kandulwa po,” ta ti.

Okwa kumaida ovapangi neendokotola opo va ha teke omukumo wokuyakula nawa oshiwana ndele nava twikile okuyandja omayakulo ouhaku.

“Osha fimana ngeenge ta mu yakula nawa ovanaudu shaashi eshi otashi va tu omukumo nokukala ve na ombili yokomwenyo tava nhu nawa omiti davo,” ta ti.

Kuugongelwa- Amadhila okwa pula omahangano opaumwene osho yo ovanangeshefa opo va shakeneke epangelo ondjilakati tashi pitile mokuyambidida oipangelo neefikola.

fhamalwa@nepc.com.na

The post Kuugongelwa-Amadhila a pula ovanailonga vouhaku va longe nondjungu appeared first on New Era.