Auleria Wakudumo

Mueteleli wanaha Netumbo Nandi-Ndaitwah ukupile tundamo kubukeleza, kuhulisa ni pulukelo kwabanana. Mwaliñusa lahae kutabela Lizazi laBanana mwa Afirika, Nandi-Ndaitwah nahupuzi banana bane balatehezwi kibupilo bwabona mwañumbili yasilimo sa 1976 mwaSoweto mwanaha South Africa, mi nahupuzi butokwa bwabuitomboli bwabonaha bubapalile hala bukamuso bwamasika kaufela akwapili mwalifasi la Afirika.

“Lilimo zemashumi aketalizo kazeketalizoho zefelile, la16 Mbuwana 1976, makululu aSoweto nafetuhile malwanelo abanana banebasina mulatu ni kamaiso yemaswe yene bata kukuzisa manzwi abona. Situhu sakubulaya banana, kungelela cwalo nimwana wandwalume Hector Pieterson, nekupatuluzi situhu sakamaiso yabukoba kwalifasi, mi nefetuzi ñumbili yabaituti kubamakalelo atukuluho mwalitaba zakale zalifasi laAfirika,” nabulezi.

Nandi-Ndaitwah naize banana baSoweto nebasalwaneli feela cinceho kwakamaiso yapuo. “Bundume bwabona nebuzwelela fatumelo yabona yakuli mwanana kaufela una nitukelo yakufumana tuto sakata, buntu, kolo ni tukuluho yakuba kaufela zebatabela mwabupilo,” nabulezi. Mubusi wanaha namamezi kuli buitomboli kaufela bone buezizwe kibanana mwaSoweto nebutusize kukwalula nzila yatukuluho yabanana mwalifasi kaufela laAfirika.

Naekelize kuli bundume bwabona nebususuelize likopano zeñwi zene lwanela tukuluho mwalifasi laAfirika, kungelela cwalo nitukuluho yanaha Namibia. Mueteleli wanaha naekelize kuli liswanelo zefumaneha zabanana kacenu neli tahile katata mi haliswaneli kukeshebiswa. Naize banana mwaAfirika kanako yacwale balukuluhile kunahana zebabata kueza mwabupilo kusina kukaupwa, mi bakona kuitenga mwalituto zeshelashelana, kungela cwalo ni tuto, sayansi, milyani, njimo, buikezezo ni kamaiso.

Unumwaha Lizazi laBanana mwa Aifirika nelitabezwi mwatasaa mutomo otwi “Kutaleleza Tukelo Yalifasi Kaufela Yakuba ni Mezi, Limbuzi ni Makete kwa Banana kaufela mwaAfirika.” Mueteleli naize swanelo yamezi akenile, lisebelezo sakata zalimbuzi ni makete kilitukelo zabutokwa zabatu mi kizabutokwa hahulu mwakuhulisa banana. Nabilaezi kuli banana basanyandiswa mwalifasi la Afirika mi liswanelo zabonana linze lilobwalobwa. Kacwalo naize kuswanela kuba ni swalisano yabatu, tutengo ni likopano kaufela kubona kuli liswanelo zabanana zatalelezwa.

The post Pizo yapuluko yetuna kumwana waAfirika appeared first on New Era.