Maraykanka oo xaqiijiyay in uu ciidankiisa kala baxay Balidoogle.

Militariga Mareykanka ayaa markii ugu horreysay si rasmi ah u xaqiijiyey inay ciidamadooda kala baxeen saldhigga Ballidoogle ee gobolka Shabeellaha Hoose, kaddib markii uu xumaaday dhabaha ay diyaaraduhu ku degaan, taas oo keentay in garoonka uusan si ammaan ah ugu shaqeyn karin diyaaradaha milatariga.

Taliye-ku-xigeenka Taliska Ciidamada Mareykanka ee Afrika (AFRICOM), Jeneraal John Brennan, ayaa sheegay in inta badan shaqaalihii milatariga Mareykanka ee saldhigga ka hawlgalayey loo wareejiyey magaalada Muqdisho, kaddib markii la qiimeeyey xaaladda garoonka iyo kharashka ku baxaya dayactirkiisa.

“Dhabaha diyaaradaha ee garoonka ayaa sii xumaanayey ilaa ay khatar noqotay in diyaarado halkaas lagu dejiyo,” ayuu yiri Jeneraal Brennan oo khadka internetka shir jaraa’id kula hadlay wariyeyaasha.

Wuxuu intaas ku daray in dib-u-hagaajinta dhabaha diyaaradaha ay ku kici lahayd tobannaan milyan oo dollar, isagoo go’aanka ciidamada looga saaray saldhigga ku tilmaamay mid gebi ahaanba ku salaysan arrimo dhaqaale.

“Waa go’aan boqolkiiba boqol ku salaysan arrimo dhaqaale,” ayuu yiri Brennan.

Inkasta oo Mareykanku ciidamadiisa kala baxay Ballidoogle, haddana AFRICOM ayaa sheegtay in Washington ay sii wadi doonto taageerada ay siiso ciidamada dowladda Soomaaliya ee dagaalka kula jira Al-Shabaab.

Warkan ayaa markii ugu horreysay soo baxay 28-kii Oktoobar, hase yeeshee AFRICOM ayaa toddobaadkii hore ka gaabsatay inay xaqiijiso bixitaanka ciidamada, iyadoo sabab uga dhigtay xasaasiyadda amniga hawlgallada milatari, sida ay baahisay warbaahinta Somalia Today.