Uwo mu ishyaka rya Tshisekedi wavuze amagambo abiba urwango yafunzwe

Guverinoma ya Repubulika ya Demokarasi ya Congo yataye muri yombi Fils Mukoko, umuyobozi mu ishyaka riri ku butegetsi rya UDPS, nyuma y’amagambo aherutse gutangaza ahamagarira urubyiruko gufata intwaro rukibasira Abanyaburayi bari i Kinshasa.

Ifungwa rya Mukoko ryemejwe na Minisitiri w’Ubutabera, Guillaume Ngefa, wavuze ko yafatiwe mu gace ka Lemba, mu murwa mukuru Kinshasa.

Uyu muyobozi akurikiranyweho guhamagarira abantu gufata intwaro bagamije kurwanya Abanyaburayi bari muri uwo mujyi.

Minisitiri Ngefa yatangaje ko Mukoko azashyikirizwa ubutabera, ashimangira ko amategeko azubahirizwa hatitawe ku ishyaka umuntu abarizwamo.

Yagize ati: “Waba uri muri UDPS cyangwa utayirimo, amategeko azakurikizwa.”

Ifatwa rya Mukoko rije rikurikira ibyemezo byari byafashwe n’Urwego rushinzwe kugenzura Itangazamakuru n’Itumanaho muri Congo (CSAC), nyuma y’amagambo ye yakwirakwijwe ku mbuga nkoranyambaga.

Amashusho yakwirakwijwe ku mbuga nkoranyambaga mu gitondo cyo ku wa Gatanu agaragaza Fils Mukoko, usanzwe ari umuyobozi wungirije w’ishami rishinzwe isuku mu Mujyi wa Kinshasa, avuga ko bagiye gukwirakwiza intwaro mu nsengero, muri za kaminuza no ku bibuga by’umupira w’amaguru.

Muri ayo magambo, Mukoko yavuze ko bashaka gutuma intambara iri mu burasirazuba bwa Congo ihinduka intambara rusange, anavuga ko Abanyaburayi bari i Kinshasa, cyane cyane Ababiligi, bagomba guhabwa gasopo.

Aya magambo yakurikiwe n’imyigaragambyo y’amagambo yo kwamagana imvugo ishishikariza abantu urugomo, bituma Guverinoma ya Congo itangaza ko itayashyigikiye.

Umuvugizi wa Guverinoma ya Congo akaba na Minisitiri w’Itumanaho, Patrick Muyaya, yamaganye ku mugaragaro amagambo yatangajwe na Mukoko, avuga ko atagaragaza na gato umurongo wa Guverinoma cyangwa uw’urundi rwego rwa Leta.

Yagize ati:* “Turamagana byimazeyo amagambo yavuzwe na Fils Mukoko. Ni amagambo ateye ubwoba cyane kandi ntaho ahuriye na gato na Guverinoma cyangwa urundi rwego urwo ari rwo rwose.”*

Muyaya yavuze ko inzego zibifitiye ububasha, zirimo CSAC n’ubuyobozi bw’Umujyi wa Kinshasa, zari zasabwe gufata ingamba zikwiye kuri icyo kibazo.

Yongeyeho ko Guverinoma itazihanganira ibikorwa bishishikariza abantu urugomo cyangwa imvugo zishobora kwangiza umubano n’abafatanyabikorwa ba Congo bo mu Burengerazuba bw’Isi.

Mu butumwa burebure yanyujije ku rubuga rwa X, Muyaya yavuze ko amagambo nk’ayo ashobora kubangamira imihate ya Perezida wa Repubulika, Guverinoma n’abafatanyabikorwa bayo, barimo u Bubiligi, mu gushaka kugarura amahoro mu bice by’igihugu bigenzurwa n’imitwe yitwaje intwaro.

Mu buryo bwo kwiyerurutsa Muyaya kandi yahumurije ambasade z’amahanga zikorera muri Congo n’abakozi bazo, avuga ko hafashwe ingamba zo kubungabunga umutekano wabo no kurinda aho bakorera.

UMUSEKE.RW