Eefikola komikunda tadi ende kashona okukufa ombinga moudano

OSHAKATI- Omuunganeki womaudano pofikola Okalumbu Combined School Jesaja Matias okwa ti eefikola di li komikunda oda taalela eshongo linene leefikola dikwao tadi holoka momwaalu mushona okukufa ombinga moudano.

Edi okwe di popya onghela pefimbo a ninga eenghundafana naKundana omo kwa li ta popi kombinga yeefikola dishona da holoka komaudano oo a liko mexuliloshivike kofikola yavo.

“Eefikola ashike hetatu da holoka. Okwa li twa shiiva eefikola dihapu nokwa li tu na omukumo kutya oda di holoka momwaalu muhapu,” ta ti.

Okwa ti okudja ketameko lomwedi ou, ofikola yavo oya ninga omafiku yepyakidila nomalongekido okukala ya ninga efiku lomadauno oo tameka okudja 18 fiyo onghela. Okwa ti omaudano aa okwa fimana shaashi otaa eta ovanafikola va hangane pamwe okuhafela pamwe. Okwa ti elalakano lomaudano aa okuongela oshimaliwa shokutunga omuhandjo wokunangala ovanafikola.

“Osha fimana ngeenge ovanafikola novanyasha tava shakene navakwao okukondjifana momaudano shaashi etashi va kwafele va longife ounongo wavo,” ta ti.

Okwa weda po ta ti omaudano okwa fimana kovanafikola shaashi otaa kwafele eputuko lokaana ka kale ke na ohokwe yomaudano.

Okwa ti okutameka peendodo nola fiyo onhimuwoi, ode li shangifa koshimaliwa N$750.

Omanga ondodo 10 fiyo 12 deli shangifa koshimaliwa N$1 000.

“Eefikola dimwe oda ti kadina oshimaliwa shokulishangifa omanga eefikola dimwe da taatela omashongo eetuwa dokuvatwala koudano osho yo omidjalo doudano,” ta ti.

Matias okwa ti eefikola da findana oda pewa omaano omapapa, omakopi osho yo oshimaliwa keemuma. Okwa ti osha fimana ngeenge ovadali tava tumu ovanafikola kopale ve uye vayambidide vakwao.

Okwa ti ovanafikola vamwe ova taalela omashongo ngaashi omidjalo domaudano neenghatu dokudjala mokapale nosho tuu oipumbiwa ya yooloka.

Okwa pula moshiwana ngaashi ovanangeshefa opo va yambidide eefikola noipumbiwa yomaudano unene tuu omatanga osho yo omidjalo.

–fhamalwa@nepc.com.na

The post Eefikola komikunda tadi ende kashona okukufa ombinga moudano appeared first on New Era.