Muxuu Gudoomiye Jaamac kala hadlay danjire Katrin Josten?

Kusimaha Madaxweynaha Jamhuuriyadda Federaalka Soomaaliya ahna Guddoomiyaha Golaha Shacabka ee Baarlamaanka Federaalka Soomaaliya, Mudane Cabdulqaadir Maxamed Nuur (Jaamac), ayaa xafiiskiisa ku qaabilay Danjiraha Jarmalka u fadhiya Soomaaliya, Sebastian Groth, iyo ku-xigeenkiisa, Marwo Katrin Josten.

Kulanka ayaa looga hadlay xoojinta iyo dardargelinta xiriirka iyo iskaashiga ka dhexeeya Soomaaliya iyo Jarmalka, iyadoo labada dhinac ay si gaar ah diiradda u saareen dhinacyada siyaasadda, horumarinta iyo xiriirka baarlamaaniga ah.

Kusimaha Madaxweynaha ayaa Danjiraha iyo ku-xigeenkiisa kala hadlay muhiimadda ay leedahay in la sii xoojiyo xiriirka labada dal, iyadoo la ballaarinayo iskaashiga dhinacyada kala duwan ee ay Soomaaliya iyo Jarmalku danaha wadaagga ah ku leeyihiin.

Sidoo kale, kulanka ayaa lagu soo hadal qaaday doorka iskaashiga baarlamaaniga ah iyo muhiimadda ay leedahay in hay’adaha sharci-dejinta ee labada dal ay yeeshaan xiriir iyo wada-shaqeyn joogto ah, taas oo gacan ka geysan karta is-weydaarsiga khibradaha iyo horumarinta hay’adaha.

Labada dhinac ayaa sidoo kale isku raacay muhiimadda ay leedahay in la abuuro fursado cusub oo lagu xoojin karo iskaashiga Soomaaliya iyo Jarmalka, iyadoo laga faa’iideysanayo xiriirka diblomaasiyadeed ee labada dal.

Jarmalka ayaa ka mid ah dalalka sida joogtada ah ula shaqeeya Soomaaliya, gaar ahaan dhinacyada horumarinta, taageerada hay’adaha dowladda iyo arrimaha siyaasadda, iyadoo labada dal ay sidoo kale leeyihiin xiriir diblomaasiyadeed oo muddo dheer soo jiray.

Kulanka ayaa kusoo dhammaaday iyadoo labada dhinac ay carrabka ku adkeeyeen muhiimadda ay leedahay in la sii ambaqaado wada-shaqeynta Soomaaliya iyo Jarmalka, lana xoojiyo xiriirka labada dal si loo gaaro iskaashi miro-dhal ah oo ka faa’iideysta labada dhinac.