Nkosilathi Sibda IKHANSILI yakoBulawayo ibika ukuba isizasungula umdlalo we-pickleball kundawo zabasakhulayo, kuma-youth clubs, ngenjongo yokusekela lumdlalo lokukhuthaza intsha ukuthi iphatheke kwezemidlalo. Lokhu kuvele ngesikhathi kuqhutshwa umncintiswano weZimbabwe Prickleball Association Community…
Nkosilathi Sibda
IKHANSILI yakoBulawayo ibika ukuba isizasungula umdlalo we-pickleball kundawo zabasakhulayo, kuma-youth clubs, ngenjongo yokusekela lumdlalo lokukhuthaza intsha ukuthi iphatheke kwezemidlalo.
Lokhu kuvele ngesikhathi kuqhutshwa umncintiswano weZimbabwe Prickleball Association Community Shield, eHornung Park koBulawayo.
Umncintiswano lo ubuqoqwe yiZPA ibambisana lekhansili yakoBulawayo lamanye amankampani akulelidolobho.
Ngesikhathi kunikezwa abanqobi bemidlalo, obemele ikhansili yakoBulawayo uJohn Mpofu uncome ubudlelwano phakathi kwekhansili leZimbabwe Pickleball Association obenze umncintiswano lo waphumelela.
“Sizakwethula lumdlalo leminye kuma-youth club, sikhangelele ukuthi siphathise ekukhuliseni abantwabethu kakuhle, sihlola ithalenta, ngasikhathi sinye siphakamisa lumdlalo,” kutsho uMpofu.
Uthe ubudlelwano lobu buhlose ukwenza ezemidlalo zifinyeleleke ebantwini abanengi, ikakhulu abasakhulayo.
Kusenjalo, abanqobi abaphezulu emncintiswaneni lo kube nguJames Thompson kwabesilisa loJulianne Strydom kwabesifazane.
Umncintiswano lo ubuhlanganise abadlali abedlula 30 abaleminyaka eyehlukeneyo njalo bevela endaweni ezitshiyeneyo.
Umongameli weZPA, uMthandazo Ngwenya, uvule ngokusemthethweni umncintiswano lo njalo wabonga abadlali, amalunga omphakathi labaxhasi ngokusekela umdlalo.
“I-ZPA iyaziqhenya ngokuqhuba lumncintiswano. Sibonga lonke usekelo esilutholileyo.”
UNgwenya uthe ngemva kokuphumelela komncintiswano wakoBulawayo, iZPA Community Shield Tour izaqhubekela njalo eHarare, Kwekwe, Mutare laseFolosi njengoba inhlanganiso iqhubeka ngomsebenzi wokukhulisa umdlalo we-pickleball elizweni.
Follow the story
