Wasiir Fiqi oo dhaliilay Go’aanka Maxkamadda Sare ku laashay dastuurka cusub

Wasiirka Gaashaandhigga Xukuumadda Federaalka Soomaaliya, Axmed Macallin Fiqi, ayaa si adag u dhaliilay go’aankii Maxkamadda Sare ee dalka ay ka qaadatay arrinta la xiriirta ansaxnimada dastuurka cusub ee Jamhuuriyadda Federaalka Soomaaliya.

Axmed Macallin Fiqi oo soo saaray war-saxaafadeed ayaa su’aal geliyay habraaca ay Maxkamadda Sare u martay soo saarista go’aanka, isaga oo ku dooday in maxkamaddu ay iyadu isku noqotay dhinac is-dhageysanaya, qareenno iyo hay’addii go’aanka gaareysay.

Wasiirka ayaa sidoo kale xusay in siyaasiyiintii hore u taageeray hirgelinta dastuurka cusub ay hadda beddelka mowqifkooda aysan waxba ka beddeli karin mowqifkii ay hore uga qaateen, isaga oo tusaale u soo qaatay doorashooyinkii ka dhacay Koonfur Galbeed, Galmudug iyo Hirshabeelle, iyo dhaarintii mas’uuliyiin cusub oo lagu saleeyay dastuurka cusub.

Fiqi ayaa hadalkiisa ku sheegay in go’aanka Maxkamadda Sare uu qayb ka yahay dadaallo uu ku eedeeyay in lagu doonayo in dalka looga furo jiho kale oo khilaaf ah, isaga oo sidoo kale sheegay in ay jiraan dhinacyo uu ku tilmaamay cadowga dalka oo arrintan ku lug leh.

Wasiirka Gaashaandhigga ayaa ugu dambeyn sheegay in dowladda Soomaaliya ay ka hortagi doonto weerar kasta oo uu sheegay in dalka looga soo qaado, isaga oo xusay in mas’uuliyadda qaranku ay ka weyn tahay danaha shaqsiyaadka.

War-saxaafadeedka wasiirka ayaa kusoo aadaya xilli uu dalka ka taagan yahay dood siyaasadeed iyo mid sharciyeed oo la xiriirta dastuurka cusub iyo go’aankii Maxkamadda Sare, taas oo sii xoojisay khilaafka u dhexeeya dhinacyada siyaasadda dalka.