Xassan Shiikh oo ka hadlay doorashadii Maanta ka dhacday Jowhar

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa hambalyo u diray Madaxweynaha dib loo doortay ee Dowlad Goboleedka Hirshabeelle, Mudane Cali Cabdullaahi Xuseen, iyo Madaxweyne Ku-xigeenka, Mudane Cabdifitaax Xasan Afrax, kaddib doorashadii maanta ka dhacday magaalada Jowhar ee xarunta maamulka Hirshabeelle.

Madaxweynaha ayaa hoggaanka cusub ugu hambalyeeyay kalsoonida la siiyay, isaga oo u rajeeyay in ay ku guuleystaan gudashada waajibaadka culus ee loo igmaday, isla markaana ay ka shaqeeyaan danaha guud ee shacabka ku nool deegaannada Hirshabeelle.

Xasan Sheekh ayaa xusay in hoggaanka cusub laga filayo inuu dardargeliyo dadaallada lagu xaqiijinayo nabadda, dib-u-heshiisiinta bulshada, dowlad-dhiska iyo horumarinta adeegyada aasaasiga ah, kuwaas oo muhiim u ah xasilloonida iyo horumarka deegaannada maamulka.

Madaxweynaha ayaa sidoo kale adkeeyay muhiimadda ay leedahay in la xoojiyo wada-shaqeynta hay’adaha dowladda, maamulka Hirshabeelle iyo bulshada, si wax looga qabto caqabadaha amni, siyaasadeed iyo kuwa bulsho ee ka jira deegaannada maamulka.

Madaxweyne Xasan Sheekh ayaa sidoo kale bogaadiyey hannaanka doorasho ee lagu soo doortay labada mas’uul, isaga oo tilmaamay in doorashooyinku ay qayb ka yihiin dadaallada lagu horumarinayo dimuqraadiyeynta iyo ballaarinta ka-qaybgalka shacabka ee siyaasadda dalka.

Doorashadan ayaa ku soo beegmaysa xilli Hirshabeelle ay waddo dadaallo la xiriira dhismaha hay’adaha maamulka, horumarinta adeegyada bulshada iyo xoojinta amniga deegaannada ay ka kooban tahay gobollada Hiiraan iyo Shabeellaha Dhexe.

Cali Cabdullaahi Xuseen (Cali Guudlaawe) ayaa dib loogu doortay xilka Madaxweynaha Hirshabeelle, kaddib markii uu doorashadii ka dhacday Jowhar helay 81 cod, halka musharraxii la tartamayay, Nuur Cilmi Xalane, uu helay 13 cod. Afar cod ayaa xumaaday, sida ay warisay Shabelle Media Network.

Hoggaanka cusub ayaa hadda wajahaya mas’uuliyadda fulinta qorshayaasha maamulka, xoojinta wada-shaqeynta dowladda federaalka iyo dowlad-goboleedka, iyo wax ka qabashada baahiyaha shacabka, iyadoo la filayo in mudnaanta la siiyo nabadda, dib-u-heshiisiinta iyo horumarinta deegaannada Hirshabeelle.