Dragon Fire natango mondabo omo eli

ONGWEDIVA-Omushikingalo Uutoni Ismael a shiivika nawa Dragon Fire okwa ti okushika eengalo oshitalendi a dalwa nasho.

Oshitalendi shaye a pewa oshali kuKalunga osha eta opo a kale omushikingalo opo a longife ounongo waye okunyakula oshiwana.

Okwa ti okudja kounona okwa kala alushe ehole okuimba nokumwenyeka vakwao kofikola.

Draggon Fire okwa yelifa ta ti okuudite etumba eshi paife ta shiki eengalo nelalakano lokuhafifa oshiwana.

Omunyasha ou okwa ti oha shiki eengalo domaludi a yooloka ngaashi eengalo doukwaito, nomaimbilo opamhepo.

Okwa ti okwa tameka okushika eengalo omudo 2018, pefimbo olo opo a mane ofikola kosekundefikola.

“Omudo 2023 onda pitifa ongalo yedina “Chokoto”la”. Ongalo e i oya eta opo ndi mono ovanhu vahapu tava pwilikine eengalo dange molwaashi oiholike unene,” ta ti.

Okwa weda po ta ti ongalo e i natango oya eta opo a kale e shiivike nawa unene tuu kovanyasha shaashi keshe eenhele domalihafifo ohaku danwa ongalo e i.

Okwa ti elalakano lokukala omushikingalo okumwenyeka oshiwana koindingili ya yooloka.

“Ondi udite etumba okukala handi longifa ounongo wange. Ohandi kala nda hafa ngeenge ndi li komesho yovanhu handi imbi,” ta ti.

Okwa ti eengalo daye oda nhuninwa unene ovanyasha shaasshi odi na etumwalaka liwa ta li yandje ehongo kovanyasha.

“Natango eengalo odo nda shika ota di hekeleke oshiwana nokutwa ovanyasha omukumo ngeenge ve li hange momaudjuu ile va hala okusholola moilonga yavo,” ta ti.

Dragon Fire okwa ti okukala omushikingalo oha shi di kounongo womunhu shaashi hake she momunhu a dulu okuimba komesho yovanhu.

Okwa ti okwa taalela omashongo oshimaliwa unene tuu ngeenge taka imba keenhele da yooloka ile okufuta oilongifo.

Okwa pula epangelo unene tuu oshikondo shouministeli wovanyasha opo shi kale tashi yambidida ovashikingalo vashona noshimaliwa okukala tava twikile okupitifa eengalo dipe.

“Ovashikingalo vamwe ova sholola shaashi va taalela eshongo loshimaliwa,” ta ti.

Okwa ti onghalamwenyo okutaalela omashongo a yooloka ashike eshi sha fimana okukala omunhu e na omukumo nelitulemo.

Okwa kumaida ovanyasha opo va longife ounongo wavo molwaashi otashi va kwafele oku li monena oyuuyemo.

“Okuvaka po oinima yovanhu ka kuna elao ashike eshi sha fimana okulongifa ounongo weni,” ta ti.

[email protected]

The post Dragon Fire natango mondabo omo eli appeared first on New Era.