Kamwi taka kalela po oshilongo koFIBA

Omudani wetanga lomokambamba lobasketball Sage Kamwi otaka kalela po oshilongo koInternational Basketball Federation (FIBA) komaudano ovanyasha va Africa neudo.

Oudano otau ka kala kodoolopa ya Abidjan moIvory Coast okudja momafiku 21 fiyo 24 omwedi o u.

ONamibia Basketball Federation (NBF) oyo ya tuma Kamwi koudano o u. NBF okwa lekela Kamwi okudja moWindhoek Olomakaya. Ekufo lombinga laye kondje yoshilongo ota li ka eta elunduluko nokuyandja owino moudano wobasketball.

Oudano otau ka eta kumwe ovadani vetanga lobasketball muAfrica nokuva pa omhito iwa opo va ulike oitalendi yavo mewiliko lovawiliki okudja koFIBA osho yo National Basketball Association (NBA).

Kamwi okwa hoololwa molwa owino nounongo waye mokudana obasketball, oukwatya wouleli waye oo we mu ninga a kale o e auke a dja moshilongo.

Ta popi omanga tava lekele Kamwi, Hamushangadjai woNBF Titus Mwahafa okwa holola kutya kamwi okwa tofwa mo molwa omikalo, oshitalendi nelitulemo laye moudano.

“Etofemo laye muvakwao ota li ulike omikalo, ounongo, owino wokudana obasketball nelitulemo laSage moudano,” Mwahafa ta holola ngaho.

Mwahafa okwa ti eespana 21 okudja muAfrica oda li da ifanwa opo di tume ovatani vavo koAbidjan. Okwa ti e i otai ka kala omhito iwa kovanyasha okuulika oitalendi yavo nokumona eemhito dokudana da yeuluka.

Mwahafa okwa twa Kamwi omukumo opo a ka ulike kutya okwa deulwa, a longele kumwe navakwao osho yo okupanga oukaume muwa omanga te li longo kovadeuli vokondje yoshilongo.

Kamwi ina hovela ashike okudana obasketball ngahenya. Okwa hovela okudana okaenda namadi.

Xe, Leonard Kamwi okwa holola kutya oukwatya waye wokukufa ombinga momaudano a yooloka okwe mu kwafela opo a hovele okudana obasketball okudja kofikola St Georges odula ya dja ko.

Okwa ti oudano womona owa patulila ovakwanedimo vavo aveshe keemhito odo tadi dulu okumonika kovanyasha okupitila moudano.

Okwa kumaida ovadali va kwafele oludalo lalo momaudano.

Sage oha danene ospana yoUnam Cadets. Ospana yaye otai kondjele ofirst division final hano tava kondjele onhele yoku ya kolixa moshikako tashi landula ko.

*[email protected] *

The post Kamwi taka kalela po oshilongo koFIBA appeared first on New Era.