Tava ongele oshimaliwa okulandela okaana okatemba

Hambeleleni Daniel

Ovakalimo vomomukunda Oneheke moshitukulwa shOmusati ova tula oukuni kumwe, tava longo noundiinini opo va landele okaana oko ke na ounghundi woulema okatemba.

Johannes Shahalaedimo Robete okwa dalwa noulema eshi vati ka dalwa nomutwe wa kula. Robete iha ende, okwa li ha popi eshi a li munini ashike oshiwana kashi shi kutya oshike sha enda mongava, iha popi vali.

Otaku hokololwa ovadali va kala nokukonga omakwafo a yooloka ashike onghalo yaye inai tya po xwepo. Johannes Hamukoto oo eli umwe wovakwashiwana ovo tava ongelele okaana oshimaliwa okwa hokokololela Kundana kutya okaana oke na ounghundi oo ihau dulu okuka endifa no ka pumbwa ekwafo lokatemba.

Okwa ti okaana iha ka ende. Ta ti ngaashi paife oke li ashike a ka umbatwa kuinakulu.

Hamukoto okwa holola kutya onghalo yomukulupe ta tumbu omutekulu keshe pamwe opo a dule oku mu endifa oya djuupalela omukulupe oo nae eedula da ninga dihapu paife.

“Omukulupe naye paife ota ende ngaho nee ta kulupa nokaana ita dulu lela vali oku ka tumba ounghundi ashike naye vene vali teli etele,” Hamukoto ta ti.

Okwa ti ova kundafana novakwashiwana vakwao vomomukunda opo va dule okulandela okaana aka okatemba konima eshi va tala omashongo aa ataalelwa kokaana nainakulu. Okwa ti natango inava shiiva lela kutya okatemba oke na ingapi ashike otava longo noudiinini opo va kale veka landa.

“Paife otweli unganeka opo tu ninge oshivilo, tu shiive tu ninge eongelo loshimaliwa,” ta ti.

Okwa weda po kutya okaana natango oke li ka pumbwa evatelo loikulya noikutu.

Natango okwa pula vali epangelo novanangeshefa opo velidope mo moshikumhungu eshi.

Okwa indila yo ovasamaria ovanamutimanghenda opo va tule oukuni kumwe vavo opo va dule okukwafa okandjona kaKalunga.

-hambelelenidaniel56@gmail.com

The post Tava ongele oshimaliwa okulandela okaana okatemba appeared first on New Era.