Mukisi gokana nokakondo kuna siginye Venduka ruha ronyama zakapana vakare tava paruka momudona

Ester Hakaala

Mukisi gokana nokakondo vana silike kuna kureta mazonagwiso mongesefa zokapana moVenduka kosingle Quarters, novarandesi ntani mambo aga gakara asi kuparuka mokapana ngesi awo kuna kunana unene ekonomi lyedigu.

Udigu wangesi kavaugeve mondangio zanavenye konyima tupu silyo sondango Willem Amutenya, moune kageve yitundwamno asi age kazire pevango lyokurandesera nyama nye kapi kakagwenepo Yuma. Amutenya katente asi esiliko eli, kuna gumu unene varandesi kapisi wokapana velike nye kuna kara asi navenye ava ava randesa nyama ngesefa gona ndi zonene ndi momambo ezi nye avaranda zokulya tupu membo.

Age kahundilire ministeli zondima, nomfi, mema, ntani ewapukururo evhu omu navagazarako magano peke nampili kuna pilisire ngombe vazidipage metarero lyovanganga yimuna, unene momukunda gwaKhomas, nokutulisapo nonkambadaro edi dina kara asi ngapi navavatera nongesefa dimwe dokulisiga siga. Apa nye kakumbwilireko koudigu wangesi, ministera gonondima Inge Zamwani kayinkondopekere asi yousili ekonomi posiruwo esi tuna kara ngesi kuna kara asi yokukonderekeda mukisi ogu kuna kara sirugana soministeli.

Ministera katente asi mukisi gokana nokakondo kwaguzigira mo 23 September, eyi nye yina kutanta asi esiliko eli kuna kara nye ngesi kwedi nakunye yina kutwaredera nye pakare maliyongo omu natuza komeho. ministeli situmbukira sawo, ministera katente asi, kukeverera mukisi nkenye asi gwahalihanene mwaza nomukunda ntani gwahatunda momukunda ogu vahovere kugugwana. Mokukwama mwendi age ministera, asi mavango gana kara asi nomukisi simpe kuna kara asi vana silike kugendagura yimuna siruwo oso awo kuna kuliyongako momunene.

Vahepa kudihakura ntani awo kuna kara asi nofarama dokoure nado vahepa kudiwenda sinano sokusika ko 100 km kutunda tupu pofarama ezi vahovere kugwana uvera wangesi. Ministera simpe katente asi mavango gamwe vanasilike, ngesi kuna kumoneka asi vana gazegurura, nokupulisira yimuna yikare tayigendi kusika komavango gomarandesero. Simwe nye vana kugazara ngesi, kuna kugazara asi niongombe vaditure pevango lyakara asi kapisi yipo avalisire nokudipa nye nondja dindindire vaditware kokatomeno mekeverero lyovanganga yimuna.

Nampili ngoso ministera kayinkondopekere nokutanta asi esiliko eli kuna reta siponga kowo avarandesa yimuna nampili ngano nyama zokulya membo zeezi nazo udigu, unene kovarandi gona wovanafarama.

Age katente asi epangero ngesi kuna kugwanekera vaholi zawo vakona kone asi nonkambadaro musinke navavhura kuruganapo mokuvatera owo yina gumu, magano aga gana pumbwa kutuna=da kwetu natuvenye nye tukare tatukeverere.[email protected]

The post Mukisi gokana nokakondo kuna siginye Venduka ruha ronyama zakapana vakare tava paruka momudona appeared first on New Era.