Ongudu yoAsoli ya indila presidente aye mo moshikumungu shopaliamente

Ongudu yoAsoli Progressive Party oya indila presidente Netumbo Nandi-Ndaitwah a katukile onghatu omaliumbato ovanapaliamente mOmutumba wOpashiwana ehe li mondjila.

Presidente wongudu yoAsoli Josef Kauandenge ota ti ongudu tai pangele nomunashipundi wOmutumba wOpashiwana Saara Kuugongelwa-Amadhila ovo tava eta opaliamente iha ye komesho nawa, ta ti oilonga yopaliamente oya pingenwa po neenghono koinima yopolitika nomapiyaaneko inaa pumbiwa.

Etitatu okwa li kwa ningwa eindilo omunashipundi a fiye po oilonga shaashi ovanhu inave mu lineekelela vali oilonga yaye tava ti oku na olwaamambinga ngee tashi ya kokuninga omatokolo.

Kauandenge okwa ti omunashipundi okwa kala nokuya moshipala oilyo yopaliamente nokukala ite i pitike i yandje oyeetwapo yayo ya manguluka pefimbo lomitumba.

Okwa indila presidente a popye nomunashipundi novanapaliamente voSwapo ndee te va lombwele va kale hava longifa omukalo weenghundafana neengudu domilameno.

She likolelela kuKauandenge, Swapo nakundafane novaleli veengudu domilameno manga eenotwaveta inadi etwa kopaliamente opo kukwashilipalekwe eemhata tadi ende nawa nokupitifa eeveta meendelelo.

Okwa ti otashi udifa nai, omido tadi ka ninga mbali paife ashike mopaliamente omwa pitifwa ashike eenotwaveta tadi valulwa, ta yandjele oshinima eshi ombedi koSwapo neengudu domilameno odo inadi hala okutula omayooloko ado penya.

“Presidente ita dulu okutwikila nokukala ashike ta tale manga opaliamente tai twikile nokudopa okuwanifa po oilonga yayo yokupitifa eeveta odo tadi yambula po eenghalamwenyo dovanhu vetu,” Kauandenge ta ti.

Okwa indila vali eengudu domilameno di kendabale okuya mumwe momahoololo omudo 2029, ta ti kutya omido o35 onduba yeengudu domilameno oda dopa okukondjifa oSwapo.

Kauandenge okwa yandja oshiholelwa shoilongo ngaashi Zambia, Botswana, Kenya, Lesotho, Mauritius naMalawi, ta ti eyomumwe leengudu domilameno ola holola eenghono dado dokukufa engudu tadi pangele koipundi paudemokoli.

Okwa indila ovaleli veengudu domilameno va tule po ekuni nomauwa eengudu opaumwene, ta ti elalakano lavo nali kale okutota po ongudu imwe yopapolitika tai dulu okukufa ko epangelo koshipundi.

Kauandenge okwa londwela kutya onghalo yopaife otai dulu okufininika opaliamente i twikile nokulonga noudjuu okupitifa eeveta ngee eengudu dopolitika oda dopa okulundulula onghalo.

The post Ongudu yoAsoli ya indila presidente aye mo moshikumungu shopaliamente appeared first on The Namibian.