Aalumentu 10 ya kwatwa koonkondo kOmusati…Iipotha 149 yomakwatokoonkondo ya lopotwa

Opolisi moshitopolwa shaMusati oya dhidhilike iipotha ya pita po150 okuza omumvo gwayi sigo o paife.

Omakwatokoonkondo ngoka oga ningilwa aantu yeli 157, moka muna aanamibia yeli 141 naangola yeli yahamano aakiintu, naanamibia yeli omugoyi osho omuAngola gumwe, aalumentu.

Opolisi yokOmusati oya ti oya pondola okumanga po aafekelwa 94,yomomwaalu ngoka omanga yamwe ya wetike natango.

Omukuluntu gwopolisi moshitopolwa shaMusati Ismael Basson okwa ti omakwatokoonkondo otaga ningilwa unene uunona uushona moshitopolwa.

“Oha shi uvitha nayi okulopotelwa okanona okashona taka kwatwa koonkondo oshoka itaka vulu okwiigamena,” ta popi ngaaka. Ta ti iiningwanima mbyoka otayi ningwa kaantu mboka haya kala nayo momagumbo nuunene kaaniilonga yomomagumbo.

Basson okwa indile aakuluntu momagumbo ya kale taya longo aanona nkene ye na okuninga uuna ya tsakaneke iiningwanima yi li ngaaka. Opolisi oya kala nokukumagidha oshigwana shi kale tashi lopotele opolisi meendelelo uuna sha longelwa omiyonena, opo aafekelwa ya vule okumangwa mbala.

Moshiningwanima oshitalala, opolisi yaMusati oya manga po omulumentu gumwe sho a kwatakoonkondo okakadhona komimvo 15.

Oshiningwanima shoka anuwa osha holoka momukunda Onandjandja. Otaku hokololwa kutya omulumentu ngoka okwa li a ka lala mumwe naanona eta tege ya kothe, ta ponokolepo gumwe.

Natango opolisi moshitopolwa shaMusati oya manga po omulumentu gwomimvo 33 sho a kwata koonkondo okakadhona komimvo 12. Oshiningwanima shoka osha holoka momukuda Onkunga.

Oshiningwanima shimwe, omulumentu gwomimvo 37 okwa mangwa po kopolisi moshitopolwa shaMusati sho anuwa a kwata koonkondo okanona komimvo 14 e taka ningi etegelelo.

Oshiningwanima shoka anuwa osha holoka momukunda Amulungundjamba moshitopolwa shaMusati.

Opolisi moshitopolwa shaShana oya kala molukongo lwomulumentu ngoka anuwa a kwata koonkondo okanona komuholike gwe gopayihole, komimvo 12 oomwedhi dha zi ko.

Sha ikwatelela kiiningwanima yomehuliloshiwike oshiningwanima shoka osha holoka momukunda Omakolombongo moshikandjohogololo Anamulenge. Otaku hokololwa kutya okanona hoka kokakadhona anuwa oka li ka kwatwa koonkondo komulumentu gwayina.

Okakadhona hoka anuwa oka li ka lala mondunda yimwe, moka omulumentu ngoka a li a yi e ta tameke oku ka pampadhala.

Sho anuwa ka papudhuka mo moomposi, omulumentu ngoka anuwa okwe ka lombwele ka mwene e te ka mbandameke noku ka kwata koonkondo. Omulumentu ngoka anuwa ke shiwike mpoka e li.

Opolisi otayi pula ekwatho moshigwana ngele o pe na ngoka e na uuyelele waangoka a longo iilonga yi li ngaaka a lopotele opolisi yi li popepi naye.

*[email protected] *

The post Aalumentu 10 ya kwatwa koonkondo kOmusati…Iipotha 149 yomakwatokoonkondo ya lopotwa appeared first on New Era.