Ovanhu ovo hava landifile moDorado Valley ova taalela oupyakadi woshimaliwa nonghalo ihe li nawa konima oilandifomwa yavo ya kwatwa ko nokutembulilwa konhele imwe oko va ka landifile.
Ova ti ovanambelewa vamuni ova kwata ko oilandifomwa yavo muJuli, mwa kwatelwa oihape noingumutulu, oyo imwe ya ka alulwa konima ya ninga naini.
Karolina Mundila okwa ti oupyakadi waye oyou kutya onhele ipe oyo va pewa kElelo lOshilando va landifile ke wete ngee oinima yavo otai ka landelwa ko ngaa.
Mundila, umwe womovalandifi vomomapandaanda ovo kwa li va tembulwa okudja pomashakeneno ondjila yoDr Kuama Riruako noHendrik Witbooi moDorado Valley, okwa ti ina kala ta dulu okulonga nghee oinima yaye ya kwatelwe ko muJuli pefimbo loshikonga shovanambelewa vamuni.
Konima eshi a ka tala ko oinima yaye, okwa ti oinima yaye imwe okwa hanga nale ya ninga nai.
“Eshi nda ka tala ko oinima yange, ihapu okwa li ya ninga nai,” osho a ti ngaho.
Mundila paife oku li umwe womovalandifi vomomapandaanda ovo tava pula Elelo lOshilando li talulule onhele oyo le va pa va kale tava landifile.
‘KAPU NA OIYEMO’
Omunashipundi wokomitiye yedina Katutura Residents Committee Benestus Kandundu okwa ti ovalandi vavo okwa li va ikilila konhele oko kwa li hava landifile nale, omanga onhele ipe oyo va pewa ihe na ovalandi va wana.
“Ovalandifi itava ningile ko oiyemo konhele ipe,” osho a ti ngaho momukanda wa shangelwa omukulunhuwiliki wElelo lOshilando Moses Matyayi.
She likolelela kokomitiye, ovalandifi otava mono unene oixuna shaashi vahapu ohava landifa oihape noingumutulu, oyo hai landwa kovanhu ovo tava ende opo hava landifile noya pumbwa okukala monghalo iwa keshe efimbo.
Mundila okwa ti okukanifa oiyemo okwa kuma omaumbo ahapu.
“Okudja momafiku o27 Auguste fiyo onena inandi longa. Onghee nee ohandi mono oixuna. Ofamili yange nayo otai mono oixuna. Ounona vange otava mono oixuna,” osho a ti ngaho.
Okwa ti okwa kendabalele okuulikila ovanambelewa omukanda waye wokulandifa eshi oinima yaye kwa li ya kwatwa ko, ashike okwa ti inave utala.
Ovalandifi ava konima okwa li va pewa omikanda dokulandifa dopakafimbo ashike okwa li va lombwelwa kutya nava kalandifile konhele oyo va pewa ipe.
Mundila okwa ti ina hafela onhele oyo ndele ta weda po kutya oi hadi eendingosho, eengholwe noikumungu ihapu kombinga yeameno.
Omulandifi umwe, Lavinia Frans okwa ti oshinima eshi osha fiya ita dulu okuyambidida ounona vaye.
“Vakwetu, ohandi file mo ondjala meumbo.
Kandi na eshi handi li medina lElelo lOshilando. Otava ti ova hala twa tota eengeshefa detu vene ndee ngee twe shi ningi, ohave tu taatayeleshi,” osho a ti ngaho.
Frans okwa ti okwa kala a tala mokulandifa oihakautu, omatama, omabanana noinima ikwao opo a dule okulanda oikulya.
Okwa ti oinima yaye nayo okwa li ya kufwa po ndee tai kana.
“Okwa li handi kendabala okulandifa oihakautu yange, omatama nomabanana. Ashike ova kufa po oinima yange aishe.
Oinima yange imwe oya kana manga imwe ya ninga nai.”
Frans okwa ti eshi a kanifa oiyemo osha kuma nai ofikola younona vaye.
“Ounona vange ihava i vali kofikola shaashi itandi dulu oku va futila.”
Kandundu okwa ti ovalandifi ove na ehalo lokukaleka onhele ya yela noinima aishe ya pumbiwa va dule okulongela ponhele yavo ikulu.
Okomitiye natango oya yandja omukanda wa shainwa kovakalimo tau yambidida ovalandifi vomomapandaanda, nosho yo omukanda wediminino wa dja komunhu oo etungo laye kwa li hali longifwa okutuvikila oinima yovalandifi ava.
The post Ovalandifi momapandaanda moshilando va kufwa oinima yavo appeared first on The Namibian.
Follow the story
