ONGWEDIVA- Ovafitaongalo okudja keengeleka da yooloka ova ti omailikano opamuhanga opashiwana naa twikile koitukulwa aishe yomoshilongo molwaashi omailikano otaa kwafele okushunifa oimbuluma pedu.

Edi ove di popya pefimbo va ninga eenghundafana naKundana oshivike sha dja ko.

Ovafitaongalo veengeleka da yooloka natango ova yandja omaliudo avo a yooloka eshi va pulwa kutya oshike tashi etifa omadipayafano moshilongo osho yo ngeenge omailikano omuhanga otaa kwafele tuu okushunifa oimbuluma pedu.

Omufitaongalo wongelaka ya Namutai Anglican Paulus Kanime okwa ti ohole yoimaliwa nonghalo yohole yomaliko oyo ta i hapupaleke omahepekafano omomaumbo tuu unene kovanyasha.

Okwa weda po ta ti ovanhu paife ova hala okudja ko okupitila moinima youpule.

“Oimengha oyo tai va shingile va ka ninge omadipao. Oshihopaenenwa shimwe osheshi kutya ovanyasha vahapu kave na etilokalunga,” ta ti.

Okwa ti ngeenge omunhu oha tila Kalunga, nena ita kala e na oumbada wokulemaneka ile okudipaa omunhu mukwao.

“Omailikano naa pule komesho koitukulwa ya yooloka shaashi ota shi kwafele oimbuluma i shune pedu,” ta ti.

Omufitaongalo wongeleka House of Healing Ministry, Apostle John Kaulumbwa okwa ti omailikano otaa kwafele okushunifa oimbuluma pedu moshilongo shaashi ngeenge ovanhu tava ilikana nena Kalunga otaa udu eshi tava pula.

“Ngeenge hatu ilikana nena Kalunga ote tupe omhepo iwa tu kale tuna ombili osho yo omhepo ei tai tu kelele okulonga oimbuluma,” ta ti.

Okwa yelifa ta ti osha fimana ngeenge oshiwana tashi twikile okuninga omailikano aa shaashi otashi eta oidjemo iwa osho yo oshilongo shina ombili noukumwe.

“Omailikano naa pule komesho, omailikano naa ningwe meedolongo opo ovanadolongo navo va kufe ombinga nokukala ve na eudeko kombinga yondjovo ya Kalunga,” ta ti.

Omufitaongalo wongeleka Celebration Ministry for all Nation, Betty Hosea, okwa ti omunhu ngeenge oha longifa omalodu sha pitilila omudjuu okulonga naye nomadilaadilo aye otaa kala longo noudjuu.

“Nena ngeenge omunhu ota longifa omalodu aahapu ota dulu okukwa twa komhepo yokulonga oimbuluma. Omalodu ohaa etele ovanhu oidjemo ii ngaashi oiponga yomeendjila, ovanhu te li denge komaumbo ile oshiponga shomindilo,” ta ti.

Okwa ti ovanhu nava kale tava konga omakwafo keengeleka opo va kale vena omhepo iwa nombili yokuholafana vakwao.

“Omailikano naa pule komesho shaashi ei oyo omhito iwa yoku ya keengolo tu pule Kalunga e tu pe omhepo iyapuki. Omhepo iyapuki oya fimana komunhu keshe shaashi tai mu kwatele komesho a longe oshilonga shiwa ndele ha ku longa oimbuluma,” ta ti.

Lwopokati opo, omufitaongalo wongeleka Last Generation Gathering International Ministry, Show Shakalungah okwa ti omailikano opamuhanaga otaa dulu okuvatela, omwene ota kumu omitima dovanhu vaye.

“Ovanhu nava kufe ombinga momailikano opo Kalunga eva pe eendunge nounongo wokuuda ko omaupyakadi onghalamwenyo,” ta ti.

Omufitaongalo wongeleka St John Parish Joolokeni Moses okwa ti omailikano okwa fimana shaashi otaa xwaxwameke ovanhu va kale nombili nolukeno.

“Ovafitaongalo nava xwaxwameke oshiwana shi kale shina ohokwe yokuilikana. Omailikano okwa fimana natango shaashi oha etele omunhu omhepo yetilokalunga,” ta ti.

Okwa yelifa ta ti ngeenge omunhu okuna etilokalunga nena otashi mu kwafele a kale e na omhepo iwa ndele ha mhepo ya Satana yokulonga oimbuluma.

Lauxuninwa, omufitaongalo wongeleka City of Life Changing Ministry, Twiindileni Nghipitwako okwa ti ovanhu vahapu otava dopa okufinda ehandu, ondubo, omaupyakadi onghalafano yopamilele.

“Elongifo nai lomalodu noingangamwifi nayo oha i eta omunhu a tumbuke omadilaadilo oupwidi.

Oupyakadi woku ehe na oilonga noimaliwa oha u eta omaupyakadi omananafano momakwatafano opaihole,” ta ti.

Okwe weda po ta ti naashi oha shi eta ovaholafani va kale vehe na ombili.

-fhamalwa@nepc.com.na

The post Omailikano omuhanga otaa shunifa oimbuluma pedu-Ovafitaongalo appeared first on New Era.