Uuministili wUundjolowele nOmayakulo gOnkalonawa owa popi kutya ompumbwe yiihauto moshikondo shuuhaku oya ya moshipala oonkambadhala dhaapangi ya vule okuthika koosenda dhuuhaku dhokomikunda osho wo okutalelapo uukilinika mboka hawu patululwa pamalupita komikunda.
Minista guundjolowele Esperance Luvindao ndhoka okwe dhi popi mopaliamente oshiwike sha zi ko pethimbo ta yamukula omapulo goshilyo shopaliamente Bonnie Susiku shinasha nonkalo yokugandja omayakulo guuhaku nondjungu kuukilinika mboka hawu talelwapo omalupita komikunda.
“Uuministili owa nongele kutya uukilinika ihawu vulu shili okutalelwapo miikandjo yimwe omolwompumbwe yiihauto, nuuministili otawu longo wa tula ombunda moshihwa okuyapukila omukundu ngoka opo ku shilipalekwe kutya omayakulo oga gandjwa aluhe kaakwashigwana,” osho a popi ngaaka.
Okwa popi kutya onkalo yomoNamibia yaakwashigwana ye li pomahala ga halakana, unene tuu komikunda, oyo hayi eta uudhigu wokuthika kiipangelo iinene uuna taya pumbwa ekwatho lyuuhaku.
“Onkene Uuministili wUundjolowele nOmayakulo gOnkalonawa ohawu shilipaleke aluhe kutya owa thikitha omayakulo guuhaku momikunda.
Shoka ohashi ningwa kushilipalekwe kutya omayakulo guundjolowele oga thikithwa naakwashigwana oya tetwa omagulu opo yaalongithe oshimaliwa okukakonga omakwatho gopaunamiti, naashoka otashi ningwa pautho lyomulandu gokuthikitha omayakulo guundjolowele kwaayehe,” osho a popi ngaaka.
Luvindao okwa popi kutya oopelesenda dha konda po85 dhAanamibia odhaakwashigwana mboka yi ikwatelela mokumona omayakulo guuhaku okuza kepangelo.
Minista okwa popi kutya uukilinika mboka hawu talelwapo nokupatuluka omalupita ohashi ningilwa omidhingoloko ndhoka dhina omwaalu omushona itaagu pitike pu tulwe iipangelo tayi kalelele.
Okwa popi kutya uuministili owa tameka woo okudhika nokuhwepopeka omahala guuhaku ngoka haga talelwa po, molwashoka ohashi kala oshidhigu okukwatelapo ongushu yuuntu womuntu uuna taya mono epango pongalangala.
Oosenda dhuuhaku dhokomikunda okwa tegelelwa dhi kalekwe pondondo ndjoka shila oongele pweya omalunduluko ngaashi eindjipalo lyaantu pomudhingoloko, nenge omalunduluko gontumba taga thiminike opo pu tulwe okakilinika kokene.
Oosenda ndhoka dhokomikunda odha totwa po nokukwathela mpoka pwaana uukilinika wu li popepi nenge uuna iipangelo iinene yi li kokule noonkondo.
Monkambadhala yokukandulapo omukundu gwompumbwe yiihauto, minista okwa popi kutya uuministili otawu kambadhala wu lande ooambulansa 60 muule womimvo ndatu pashimaliwa twa taalela opo ku nkondopekwe omayakulo guuhaku gokuyamukula meendelelo iikumungu yuundjolowele moshilongo ashihe.
Okwa lombwele opaliamente kutya omathaneko ngoka ogeli oshitopolwa shenenedhiladhilo lyohwepopeka onkalo yompumbwe yooambulansa nokuyamukula mbala kwaamboka taya pumbwa omakwatho meendelelo.
Ooambulansa 36 okwa li dha landwa muMei 2025 nodha topolelwa iitopolwa ya yooloka moshilongo, omanga omambamba omugoyi gooambulansa otaga ka gandjwa kiitopolwa ya yooloka momukokomoko gwiiwike itatu twa taalela, osho minista a popi ngaaka.
“Ooambulansa ndhoka (dha landwa) odho ashike tadhi vulu okulandwa nokashona hoka ka pewa uuministili,” osho Luvindao a popi ngaaka.
Uuministili otawu talulula wo iihauto mbyoka ya pewa iipangelo miitopolwa yilwe, opo yi galulwe ko yo yi gandjwe koondolopa dhilwe ndhoka dhili monkugo yina onkambe ngaashi ondolopa yaMariental.
Omumvo gwa zi ko, epangelo lyaJapan okwa li lya gandja kepangelo uuloli wooambulansa utatu wongushu yoomiliyona N$9.
Uuloli mboka okwa li wa gandjwa kiipangelo ngaashi shaPuwo moshitopolwa shaKunene, koshipangelo shaKatima Mulilo moshitopolwa shZambezi osho wo koshipangelo shaKeetmanshoop moshitopolwa sha||Kharas.
The post Ompumbwe yiiyenditho otayi kateke omayakulo guuhaku komikunda appeared first on The Namibian.
