Rusizi: Hari abigabiza imirima y’abaturaga bagacukura bashaka zahabu

Abaturage bo mu murenge wa Gitambi bavuga ko bahangayikishijwe n’ubucukuzi bw’amabuye y’agaciro butemewe bukorerwa mu mirima yabo.

‎Abaturage bavuga ko hirya no hino mu murenge wabo, mu mirima y’abaturage hari abantu bayigabije bayikoreramo ubucukuzi bw’amabuye y’agaciro bita ‘zahabu’ mu buryo butemewe.

‎Banavuze kandi ko nyiri umurima watangiye gucurwa, aba atemerewe kuwugeramo bitewe n’uko ngo ashobora kuhasiga ubuzima, bitewe n’uko aba bukora ubucukuzi bafite intwaro gakondo.

Abafatirwa muri ibi bikorwa ngo iyo bashyikirijwe inzego zibishinzwe bahita bagaruka, bagakomeza ubucukuzi butemewe.

Maurice (twakoresheje izina rimwe k’ubw’umutekano we) avuga ko umurenge wabo wabaye indiri y’ubucukuzi bw’amabuye y’agaciro butemewe.

Ati “Abacukura hano mu murenge wacu, ni benshi baturuka i Nyakabuye, Mashesha, Busozo n’ahandi bacukura mu mirima itari iyabo, no mu mugezi wa Njabwe.”

Telesphore na we ni umuturage avuga ko ubucukuzi butemewe buhamaze igihe, ko ababukora ari ibihazi bigabiza imirima yabo.

Ati “Inaha ubucukuzi bwa zahabu bumaze igihe kinini, ababukora ni ibihazi, nta ubegera ngo abavugishe, banakwica baba bitwaje ibikoresho bikomeye.”

Ikindi giteye inkeke, abakora ubu bucukuzi nta bwishingizi bw’ubuzima bafite.

Abaturage bifuza ko inzego zitandukanye zahagarika ibi bikorwa. Telesphore ati “Ntabwo tuzi uko bigenda, barafatwa bwacya ukababona bari gucukura. Turifuza ko ubuyobozi bubifatira ingamba.”

Maurice we yakomeje agira ati “Hari ababuriramo ubuzima, hari n’uwo cyaguyeho bamukuyemo ubu yabaye ikimuga, ntacyo yimariye. Turifuza ko ibirombe babihagarika.”

Ubuyobozi bw’umurenge wa Gitambi buvuga ko nta kampani bafite yemerewe gukora ubucukuzi bw’amabuye y’agaciro, ko iyari yemerewe gukora ubushakashatsi yahagaritswe.

Manirarora James ni Umunyamabanga Nshingwabikorwa w’umurenge wa Gitambi, ati “Ku kibazo cy’ubucukuzi, nta kampani dufite yemewe, iyo twari dufite yari ifite ibyangombwa by’ubushakashatsi RMB yarayihagaritse.”

Yaburiye abaturage bishora mu bucukuzi bw’amabuye y’agaciro batabiherewe uburenganzira, ko hari ibihano bikomeye biteganyijwe, anabasaba gutanga amakuru y’ababukora.

Ati “Ntabwo abaturage bemerewe gucukura, turabakangurira gutanga amakuru y’abari gucukura muri iyo mirima. Uzabigaragaramo azabihanirwa nk’uko amategeko abiteganya.”

‎Itegeko No 072/2024 ryo kuwa 26 Kamena 2024 rigenga ubucukuzi bw’amabuye, rivuga ko ibi bikorwa, bikorwa gusa n’umuntu wabiherewe uruhushya.

‎Iri tegeko rivuga ko uwahawe uburenganzira bwo gucukura amabuye asabwa gusiba imyobo n’ibisimu byacukuwe mu ikorwa ry’imirimo, cyangwa gushyiraho uburyo bwo kuhacungira umutekano.

Abaturage basaba ko ibi bikorwa bihagarara Abaturage batinya kubegera kubera ko baba bafite intwaro gakondo

‎MUHIRE Donatien
UMUSEKE.RW/RUSIZI