Yatatu ya tidhwa mongundu sho yuula Lukato omukayamukulwa

Ongundu yompilameno yedhina National Democratic Party(NDP) oya tidha iilyo yongundu yawo itatu poonkatu dhopombanda sho taku hokololwa ya kala noku ula omupresitende gwongundu yawo Martin Lukato kutya omukayamukulwa.

Mboka yu ulukilwa omunwe oyo amushangandjayi Alex Linyando, omukwatakanithi gwongundu moshitopolwa Allen Mwilima osho wo omukuluntu gwiipambele yomupresitente Obrien Lisulo.

Otaku hokololwa kutya iilyo mbyoka itatu okwa li ya kwatele komeho omapopyo moshigwana kutya Lukato otiihumbatele ongundu noku yi lela paukayamukulwa sho teyi lele naakwanezimo ye, ta longitha oshimaliwa shongundu ngaashi a hala, osho wo okweeta evundakano kiilyo mbyoka itaayi tsu kumwe nomadhiladhilo ge naashoka ohashi eta yi thigepo ongundu.

Omupevipresitente gwoNDP David Mwilima, pethimbo lyoshigongi shiikundaneki oshiwike shika okwe elehi omapopyo ngoka nokwa popi kutya kagena uushili nokugwedhapo kutya otaga ningilwa owina nelalakano lyokunyatekitha edhina lyaLukato osho wo lyongundu.

Okwa gwedhapo kutya ongundu yawo otayi lalakanene uukumwe.

Onkene itaya idhidhimikile mongundu yawo iilyo yi ihalela pombanda, iilyo yina ondumbo osho wo mboka yena omalalakano gawo gopaumwene ya dhine ombepo yuukumwe mongundu yawo.

“Omapopyo ngoka otaga uvitha nayi, otaga pukitha noshayela kutya oga nuninwa okunyatekitha edhina lyomupresitente osho wo edhina ewanawa lyongundu yoNDP. Onkene, ongundu oya ninga etokolo opo iilyo mbyoka yi tidhwe.

Alex Linyando, Allen Mwila osho wo Obrien Lisulo otwe ya tidha mo pambelewa moNDP, sha tulwa miilonga mbala, niinakugwanithwa kwa li yi inekelelwa oye yi kuthwa,” osho a popi ngaaka.

Mwilima okwa gwedhapo kutya ongundu oyi itula mo mokunkondopeka omitungilo dhawo, okulongela oshigwana shaNamibia osho wo okunkondopeka onkatu yokukala mopaliamente.

Otashi uvitha nayi okutala kutya opuna oohandimwe mboka ya hogolola omalalakano gawo gopaumwene pakuponokela aantu mokati koshigwana peha lyoku shi kundathana paukuluntu meni lyongundu.

Elelo lyongundu yoNDP otali ekelehi omapopyo ngoka ga andjaganekwa moshigwana.

Ongundu onkene yi ikolelela kekotampango lyuudemokoli, uuleli waayehe, okulonga puuyelele osho wo okusa oshimpwiyu shiinakugwanithwa tuna. Kehe etokolo tali ningwa kelelo olyi li pawiliko lyekotampango lyongundu, muuwanawa woshigwana osho wo nelalakano lyokutunga ongundu ya kola tayi vulu okugandja shoka tashi pumbiwa kAanamibia,” osho a popi ngaaka.

Gumwe gwomwaamboka ya tidhwa, Linyando okwa lombwele onzonkundaneki ndjika uunambo kutya oya kumithwa ketokolo lya ningwa lyoku ya tidha mongundu molwashoka kaya li natango ya pewa oombapila ndhoka tadhi koleke etokolo ndyoka.

Okwa popi kutya pakotampango lyongundu, Lukato naMwilima kayena nande uuthemba wokutidha omuntu mongundu inaashi pitila miihokolola.
“Okwa li nda hogololwa kiilyo yongundu ngaashi naanaa Lukato a hogololwa kaantu.

Okomitiye yokutidha aantu inayi kwatathana natse opo tuye miihokolola.

Katuna ombapila tayi popi kutya otwa tidhwa; naashoka otashi ulike owala nkene Lukato ta longitha oonkondo dhe pambambo.

Etokolo ndika lyoku tu tidha olya ningwa owala kuLukato naMwilima pwaana epopilo okuza kokomitiye yelelo. Oshinima shoka ngame oshina okuthigandje nda lala,” osho a popi ngaaka.

The post Yatatu ya tidhwa mongundu sho yuula Lukato omukayamukulwa appeared first on The Namibian.