Okumonika okaangela ha ko exulilo lounyuni

Esther Shikale-Kahenge ota yandje oumbangihokololo eshi a lwifa omukifi wokaangela wopondondo onhinhatu nafiyo teu findi.

Shikale-Kahenge edi okwe di holola koshivilo shedimbuluko lomukifi wokaangela oo hau dimbulukwa momwedi waOktoba odula keshe sha li koshipangelo shopaumwene Olomakaya mEenhana moshitukulwa shaHangwena. Okwa hokolola nghene a kwatwa komukifi wokaangela, eshi a lumba nao fiyo osheshi teu findi okudja momudo 2022. Okwa ti ka kwali shipu eshi a lombwelwa kutya okwa monika omukifi wokaangela nokwa li a tila ye okwa kumwa.

Shikale-Kahenge okwa ti konima eshi a monika omukifi okwa ya koshitandelo oko haku kalwa oule woikando ya fika huihetatu ya shiivika nawa “eight cycles of chemotherapy no radiation therapy”

“Olweendo lomunhu ta lumbu nomukifi wokaangela ka li pu nande. Efimbo limwe owa loloka, efimbo likwao owa lulilwa nefimbo limwe owa tila,” ta hokolola ngaho.

Ashike molwaashi okwa kala omwiitaveli nomulididimiki, oshe mu kwafela fiyo ta findi okaangela.

“Ame omufindani, onda lwa nonda kondja nonena ondi na oumbangihokololo nghee nda finda omukifi o u,” ta ti.

Okwa ti omusamane waye, oundenge, ookahewa nounona vaye ovo ovanhu vamwe va dana onghandangala monghalamwenyo yaye opo a finde omukifi ou.

“Omailikano avo, ohole osho yo etalele po lavo keshe fiku ola kala nokudimbulukifa nge kutya i ta ndi lu oudju o u aame andike,” ta ti

Natango okwa ti ota pandula ovapangi vaye ovo va kala noku mu yakula, ohole yavo nonghenda oyo ve mu ulikila oya kula.

Shikale-Kahenge ota tu ovanhu aveshe ovo tava lumbu noudu wokaangela opo va pitike ovaholike vavo osho yo ovahakuli vavo veva pitike opo va lwile pamwe navo moudju omu tave li hange.

“Ino kala wafa u wete oove auke wa taalela oudu o u, kala omwiitaveli,” ta ti.

Okwa ti oshi li mondjila omunhu ngeenge okwa lombwelwa kutya oku na omukifi wokaangela a kwene ,a kale a tila ye ta kongo omakwafo movanhu. Ta ti oumunhu i na pumbwa ashike okukala elididimika shaashi ope na efimbo limwe olo omunhu a pumbwa okupopya nomulineekelwa kombinga yomukifi oo ta lumbu nao nokumona exungomwenyo. Shikale- Kahenge okwa kumaida ovakainhu opo va kale tava i koshipangelo va ka ninge omakonakono okaangela yokomavele. Okwa ti nava kale yo veshii omalutu avo nokukala tava ningi omapekapeko noku li tala efimbo keshe opo ngeenge va mono omadidiliko okaangela ile oitumba komavele va mone ekwafo lomeendelelo. Natango okwa ti ovanhu ava vena ovakwanedimo vavo tava lumbu nokaangela nave va fiile oshisho nokuva ulikile ohole ndele i na veva pilamena.

“Nena ondi li apa ndi na oumbangihokololo kutya oku monika okangeela hako exulilo lounyuni,” Shikale-Kahenge ta ti.

Okwa ti oku wete kutya oumbangihokololo waye ota u tu ovanhu vahapu omukumo unene tuu ovo va kanifa omukumo monghalamwenyo opo va twikile nokulwifa okaangela.

*[email protected] *

The post Okumonika okaangela ha ko exulilo lounyuni appeared first on New Era.