Shirdoon oo soo bandhigay 5 qodob oo Soomaaliya lagu badbaadin karo

Ra’iisul Wasaarihii hore ee Soomaaliya, Cabdi Faarax Shirdoon (Saacid), ayaa soo bandhigay shan qodob oo uu sheegay inay saldhig u noqon karaan badbaadinta iyo dib-u-dhiska Jamhuuriyadda Saddexaad ee Soomaaliya.

Qoraal uu ku baahiyey bartiisa X, Shirdoon ayaa sheegay in mustaqbalka dowladnimada Soomaaliya uu ku dhismi karo dastuur lagu heshiiyey, dib-u-heshiisiin dhab ah, amni waara, midnimo qaran iyo hay’ado dowladeed oo awood leh oo si hufan u shaqeeya.

Shirdoon ayaa sheegay in dastuurka dalka loo baahan yahay inuu noqdo mid ku dhisan heshiis iyo is-afgarad ay Soomaalidu si wadajir ah u gaarto, isaga oo xusay in dib-u-heshiisiin dhab ah ay muhiim u tahay soo celinta kalsoonida iyo xoojinta wadajirka bulshada.

Waxa uu sidoo kale tilmaamay in amni waara iyo midnimo qaran ay yihiin tiirar muhiim u ah dowlad Soomaaliyeed oo shaqaynaysa, halka hay’adaha dowladdana uu sheegay inay u baahan yihiin awood iyo madax-bannaani ay si hufan ugu gutaan waajibaadkooda.

“Shantan qodob waxay si wadajir ah u dhisayaan aasaaska dowlad Soomaaliyeed oo shaqaynaysa,” ayuu yiri Shirdoon.

Hadalkan ayaa kusoo beegmaya xilli Soomaaliya ay ka taagan yihiin dooddo siyaasadeed oo ku saabsan hannaanka doorashooyinka, wax-ka-beddelka dastuurka iyo xiriirka u dhexeeya dowladda federaalka iyo siyaasiyiinta mucaaradka.