Ovamulonga tava ka deulwa okuyambula po oikunino

OMULONGA – Kansela woshikandjohoololo shaMulonga Erickson Ndawanifa okwa pula ovanhu ve na oikunino younamapya ve li moshikandjohoololo shaye opo va kale ve li shangifa kombelewa yaye nelalakano lokupewa omadeulo osho yo oilongifo.

Ndawanifa edi okwe di popya onghela pefimbo a ninga eenghundafana naKundana.

Okwa yelifa ta ti ovanhu ve na oikunino yopaumwene ile oikunino oyo yomomudingonoko ya yambididwa nale kepangelo aveshe ova manguluka oku li shangifa.

Kansela okwa ti ounamapya owa fimana shaashi otau yambula po eliko loshilongo osho yo okueta po eemhito doilonga kovanyasha.

Ndawanifa okwa ti ombelewa yaye otai ka longela kumwe nouministeli wounamapya nounaimuna opo u kale wa yambidida oshiwana shaashi opena oprograma ya nuninwa okuyambidida oukunino.

Okwa ti osha fimana opo ovanhu va kale ve li shangifa pefimbo molwaashi otava ka etelwa ouwa. “Onda didilika moshikandjohoololo shetu mu na oikunino ihapu ya taalela omashongo. Otashi kwafele oikunino yavo ixumekomesho ngeenge oya yambididwa,” ta ti.

Okwa yelifa ta ti ngeenge mwene woshikunino okwa pewa omadeulo ile oilongifo nena otashi kwafele a kale a yambula po oshikunino shaye ndele ta longo oikulya yomaludi ya yooloka. “Ounamapya owa fimana shaashi otau lwifa ondjala nokuxwaxwameka omangeshefelo tashi pitile mokulandifa oikunonwa,” ta ti.

Ndawanifa okwa ti natango, komafiku okomesho ombelewa yaye otai ka pula ovanhu tava tekula eexuxwa opo ve li shangife. Okwa weda po ta ti natango, ota ka pula ovanyasha ovo ve na oinyangadalwa yeeproyeka da yooloka opo navo ve li shangife. “Navo, otava ka yambididwa okupewa omadeulo osho yo oilongifo. Ohatu lalakanene okulwifa ondjala nokueta po eemhito doilonga,” ta ti.

Okwa weda po ta ti omadeulo ounamapya okwa fimana shaashi otaa yandje ounongo kovanhu nghene ve na okulonga noimeno ile noimuna. “Omunhu ngeenge okwa pewa omadeulo nena ota dulu okuyandja omadeulo kovanhu vakwao,” ta ti.

Kansela okwa ti ombelelewa oya tula moilonga eeprograma da yooloka da nhuninwa okuyambidida ovanyasha.

“Osha fimana ngeenge oinyangadalwa yovanyasha tai yambididwa molwaashi otashi vaxwaxwameke va longe nondjungu,” ta ti. -fhamalwa@nepc.cpm.na

The post Ovamulonga tava ka deulwa okuyambula po oikunino appeared first on New Era.