Ehangano loNamibia Film Commission “NFC” ole li pyakidila noku talela po oitukulwa ya yooloka moNamibia oku andjakaneke ouyelele unasha neyambidido lovadani voinyandwa moshilongo.

Ehangano eli ola li la talela po oshitukulwa shaShana oshivike sha dja ko omo la li la ongalifa ovakufimbinga oinyandwa ya yooloka moshilongo. Ola li yo ta li andjakanifa ouyelele unasha nonghee hali longo.

Zeccano Shitaleni oo ha dana oinyandwa moNamibia nokwa li yo omukufimbinga a kula momutumba ou okwa ti elalakano lomutumba ou okuyandja ouyelele kovadani voinyandwa nghee vena oku shi enda opo oilonga yavo i dulwe oku didilikwa nokufutwa kehangano lo NFC.

“Omunhu opo u kale wa dula okwa kwafa kehangano eli, imwe yomuyo una okukala una oinyandwa, vo tavei tula koshiyelekifo va tale nghee vena oku kala veku futa opo u pitife oinyandwa yoye momukalo weefilima,” ta ti.

Shitaleni okwa hokolola kutya moNamibia omuna ovanhu vena oitalendi ihapu lela ashike omaunongo avo ove a kala ashike omutumba mokuhashiiva kutya opena apa tava dulu okufinda ndele enongo taafe ongobe.

“Ame opo ndi ndjeko onda kala noku andjakanifa oilonga yange lela ndeli tula mo, fiyo tai monika koKino Namibia, ehangano olo lili koshi yo NFC,” ta ti.

Okwa ti konima eshi oilonga yaye ya monika okwa hoololwa a kaye momafiyano navakwao oku dana oinyandwa omo ali aninga omufindani wotete nokwa findana ongushu yoimaliwa o N$50 000.

Shitaleni okwa lombwela oombushe vaye moilonga kutya NFC ehangano olo lililepo ovadani voinyandwa moshilongo shili loo vali ota li eta eyooloko meenghalamwenyo da vahapu.

Okwe vatwa omukumo va twikile noku danwa oinyandwa yavo vo tave li shangifa koNFC.

–taimihaihambo2000@gmail.com

The post NFC ota dimbuluka ovadani voinyandwa moshilongo appeared first on New Era.