Meatco taka yandja omadeulo kovanafaalama

** Hambeleleni Daniel**

Ehangano lo Meatco ota li ka yandja owino kovanafaalama mounamapya, ounanaimuna nonghene ve na okuxupa nokuxumifa eengeshefa davo komesho onga ovanafaalama.

Meatco, otaka yandja omadeulo aa koitukulwa ya yooloka moshilongo, okudja mu Oktoba neudo.

Elalakano lo programme okukwafela ovanafaalama nghene ve na okulongifa oyuuyemo yavo onga ovanafaalama novanaimuna vanini, okukaleka po ongeshefa yoye osho yo okulandifa nokuyambula po oilikolomwa yavo.

Ehangano ola shiivifa ta li ka enda noitukulwa okuudifa evaengeli e li, sha landula omadeulo a faafana oo taa ifanwa Farmer Business School (FBS), a ningilwa koMashare Agricultural Development Institute (MADI) koshitukulwa shaKavango East.

Omadeulo ovanafaalama ava okwa kwa ta oule womafiku atano. Omadeulo aa okwa li a eta kumwe oikondo yepangelo ya fika po12. Oshikondo shounapya nounaimuna okudja kouminista wounamapya nounaimuna ,eeshi, omeva, nomatalululo omadu.

Ovanambelewa okwa li va deulwa opo va dule oku ka longa ovanhu koitukulwa ya yooloka.

Omukulunhu wo Meatco Dalicia Oliver okwa holola kutya oprograma e i oilile po oku pa ovanafaalama ounongo osho yo oilongifo oyo tai va kwafele opo va kale ve na eengeshefa deefaalama da kola nodoshinanena.

“Otwa hala okukwafela ovanafaala aveshe opo va kale va mona ounongo o u noilongifo, kutya nee omunafaalama ile omunaimuna woludi lilipi po, aveshe otwa hala va shiiva ongeshefa ,” Oliver ta holola ngaho.

Okwa holola kutya tete okwa li va ningila omalolelo koTsumamas koshitukulwa shaKunene mu May neudo, manga ina va tameka novakwashiwana aveshe.

Omunambelewa koshikondo shokupangela Vevangapi Kahipura okwa ti omadeulo aa otaa kwafele ovanafaalama opo ve li honge shina sha nexumokomesho osho ta shi keva kwafa opo va dule okukala tava mono omauwa.

“Otwa teelela oku ya kovanafaalama nokuvadeula nghee ve na okulongifa oilongifo yoshinanena oyo tai ka kwafela okuyambula po eengeshefa davo,” Kahipura ta ti.

Oprograma e i oya kwatelwa komesho komahangano a yooloka ngaashi: Meatco Foundation, Meatco Northern Communal Areas, Namibia National Farmers Union no GIZ farming for Resilience.

Omahangano a hangana okukwafa ovanafaalama okwa holola kutya ova longifa omikalo nhatu okushi pondola okueta omadeulo aa kovanafaalama. Ova ti tete ova ninga omalolelo koshitukulwa shaKunene, olutivali ova longa ovalongi veli 12 nopaife ovateelela ovalongi ovo va ka longe ovanafaalama va fika po800.

Ova ti elalakano lavo okukwafela ovanafaalama vopedu ovo hava longo ashike opo vapalule ovakwanedimo vavo naavo ve na ehalo lokutameka ongeshefa.

Omadeulo aa okwa teelelwa a ka yandje owino kovanafaalama va fika po800 ovo natango va teelelwa va ka andjaneke owino e i kuvahapu momidingonoko davo moitukulwa aishe yoshilongo.

–hambelelenidaniel56@gmail.com

The post Meatco taka yandja omadeulo kovanafaalama appeared first on New Era.