‘Omahangano gokukutila aantu miilonga naga taalele ooveta dha kwata miiti’

Oshilyo shongundu yoSwapo mopaliamente, Justina Jonas okwa pula omahangano ngoka haga kwathele okukutila aantu miilonga ga taalele omilandu dha kwata miiti uuna taga gandja aaniilonga kaagandji yiilonga mboka itaaya iyutha kooveta dhaaniilonga moshilongo.

Jonas okwa gandja omapulo kuminista gwaaniilonga Wise Immanuel kombinga yomilandu dhinasha nomahangano ngoka haga kutile aantu miilonga osho wo aagandji yiilonga mboka haya pewa aaniilonga komahangano ngoka.

Okwa pula minista a yelithe kutya omahangano ga ngapi gopaumwene gokukutila aantu miilonga ge li moshilongo, osho wo kutya ga ngapi ge na omikanda dhi li natango paveta, osho wo kutya ga ngapi ga ningilwa omakonakono muule woomvula ndatu dha piti.

Jonas okwa pula wo uuyelele womuule kombinga yomahangano ngoka gokukutila aantu miilonga ngoka kwa li ga kwatwa taga longo kaagena omikanda nenge gaya pambambo oveta yaaniilonga, osho wo kutya oonkatu dhini ga katukilwa.

Okwa hala woo oku uva kutya aaniilonga yangapi ya kutwa pamukalo ngoka miikondo ngaashi shoomina, shomahooli noohaasa, shomatungo, shoosekuliti osho wo shokuyula oohi.

“Oshikumungu oshinene otashi ka kala kokutala ngele omalunduluko ngoka ga thanekwa mOveta yOmayakulo gAaniilonga otaga ka kandeka ngaa omahangano gokukutila aantu miilonga kaaga gandje we aantu kaagandji yiilonga mboka itaaya iyutha osho wo okuhulithapo ekuto kaali kale tali longithwa okudhina uuthemba waaniilonga, mwa kwatelwa okudhina omahanganokalelipo gaaniilonga osho wo omauthemba agehe,” osho Jonas a popi ngaaka momukanda ngoka a tula poshitaafula mopaliamente, mEtiyali.

The post ‘Omahangano gokukutila aantu miilonga naga taalele ooveta dha kwata miiti’ appeared first on The Namibian.