RDC yirukanye Abashinwa n’Abanyafilipine barenga 100

Repubulika Iharanira Demokarasi ya Congo (RDC) yirukanye Abashinwa n’Abanyafilipine 114 bakekwagaho kutubahiriza amategeko agenga abinjira n’abasohoka, nyuma y’igenzura ryakozwe mu ntara za Haut-Katanga na Lualaba zikungahaye ku mabuye y’agaciro.

Itangazo ry’Urwego Rushinzwe Abinjira n’Abasohoka muri RDC (DGM), ryashyizwe ahagaragara ku wa 19 Ukwakira 2026, rivuga ko abo banyamahanga birukanywe mu gikorwa cyakorewe mu ntara za Haut-Katanga na Lualaba.

Abirukanwe benshi babarizwaga mu bucukuzi bw’amabuye y’agaciro n’ubwubatsi.

Muri abo 114, abagera kuri 44 bafatiwe mu ntara ya Haut-Katanga, mu gihe abandi 70 bafatiwe muri Lualaba. Igenzura ryabereye mu mijyi ya Lubumbashi na Kolwezi.

Iki gikorwa cyatangiye ku wa 15 Ukwakira 2026, gikorwa n’abapolisi bashinzwe abinjira n’abasohoka muri izo ntara zombi.

Itsinda rya nyuma ry’abirukanwe ryavuye ku butaka bwa Congo mu rukerera rwo ku Cyumweru, tariki ya 18 Ukwakira 2026, rikoresheje indege ya Ethiopian Airlines.

Abo bantu bajyanywe mu Bushinwa, mu mijyi ya Guangzhou na Beijing, banyuze i Addis Ababa muri Ethiopia. Muri iryo tsinda harimo Abashinwa 24 bari bafatiwe i Lubumbashi n’Abanyafilipine bane bari mu bafatiwe i Kolwezi.

Ubutegetsi muri Congo buvuga ko abanyamahanga bose ko bagomba kubahiriza amategeko agenga abinjira n’abasohoka muri icyo gihugu, mbere yo gutangira gukora ibikorwa bibinjiriza amafaranga.

UMUSEKE.RW