Golaha Mustaqbalka oo iska fogeeyay xubinimada Sanbaloolshe.

Madasha mucaaradka ee Golaha Mustaqbalka Soomaaliyeed ayaa iska fogeysay xubinimada Cabdullaahi Maxamed Sanbaloolshe, kadib markii uu wareysi uu bixiyay ku sheegay inuu kamid yahay Golaha Mustaqbalka Soomaaliyeed.

Xoghayaha Golaha Mustaqbalka Soomaaliyeed, Xildhibaan Cabdullaahi Carab, ayaa sheegay in Sanbaloolshe uusan xubin ka ahayn Golaha, isagoo meesha ka saaray hadalka uu horey uga sheegay inuu kamid yahay madasha mucaaradka.

Cabdullaahi Maxamed Sanbaloolshe, oo horey u soo noqday taliyaha Hay’adda NISA, ayaa wareysi uu bixiyay kaga hadlay xaaladda siyaasadeed ee dalka, isagoo sheegay inuu kamid yahay Golaha Mustaqbalka Soomaaliyeed.

Si kastaba ha ahaatee, Xoghayaha Golaha Mustaqbalka ayaa si cad u sheegay in Sanbaloolshe uusan kamid ahayn xubnaha Golaha, taas oo meesha ka saaraysa sheegashadiisa ku aaddan xubinimada madasha.

Golaha Mustaqbalka Soomaaliyeed ayaa ah madal ay ku mideysan yihiin qaar kamid ah siyaasiyiinta mucaaradka, kuwaas oo si joogto ah uga hadla arrimaha siyaasadda, doorashooyinka iyo hannaanka dowladnimada Soomaaliya.