Somalia oo Cambaareysay weerar ka dhacay kaniisad ku taalla Urdun

Dowladda Federaalka Soomaaliya ayaa si adag u cambaareysay weerar hubeysan oo lagu qaaday kaniisad ku taalla gobolka Karak ee koonfurta dalka Urdun, kaas oo sababay dhimasho iyo dhaawac soo gaaray dad rayid ah oo ka qeybgalayay munaasabad aas ah.

War-saxaafadeed ay Dowladda Soomaaliya soo saartay Sabtidii ayay ku muujisay sida ay uga soo horjeeddo weerarka, iyadoo sheegtay in falalka noocan oo kale ah ay khatar ku yihiin nolosha dadka rayidka ah, nabadda iyo wada noolaanshaha bulshada.

Dowladdu waxay carrabka ku adkeysay muhiimadda ay leedahay ilaalinta goobaha cibaadada iyo meelaha ay dadweynuhu isugu yimaadaan, iyadoo tilmaantay in goobaha diimeed ay tahay in laga dhowro weerarrada iyo falalka rabshadaha wata.

Sidoo kale, Dowladda Federaalka Soomaaliya ayaa sheegtay inay diiddan tahay rabshadaha iyo xagjirnimada nooc kasta oo ay yihiin, iyadoo muujisay sida ay uga xun tahay khasaaraha nafeed ee ka dhashay weerarka lagu qaaday kaniisadda.

Soomaaliya ayaa garab istaag u muujisay dowladda iyo shacabka Urdun, iyadoo tacsi u dirtay qoysaska ay ka geeriyoodeen dadkii ku dhintay weerarka, halka dadka dhaawacmayna ay u rajeysay caafimaad degdeg ah.

Weerarka ayaa dhacay Jimcihii, 23-ka Oktoobar 2026, xilli dad badan ay ka qeybgalayeen aas ka socday Kaniisadda Hamoud ee tuulada Hammoud, gobolka Karak, oo ku yaalla koonfurta Urdun.

Sida ay sheegeen saraakiisha amniga dalkaas, rag hubeysan ayaa gaari ka soo degay bannaanka kaniisadda, kaddibna rasaas ku furay dadkii halkaas isugu yimid. Weerarka ayaa sababay argagax xooggan, iyadoo dadkii goobta ku sugnaa ay isku dayeen inay ka baxsadaan rasaasta.

Wararkii ugu horreeyay ayaa sheegay in toddoba qof ay dhinteen, 34 kalena ay dhaawacmeen. Hase yeeshee, warar dambe oo soo baxay Sabtidii ayaa sheegay in tirada dhimashadu ay kor u kacday, iyadoo warbixinnada warbaahinta qaarkood ay sheegeen siddeed qof, halka kuwo kale ay sheegeen sagaal qof.

Mas’uuliyiinta Urdun ayaa weerarka ku tilmaamay fal argagixiso, waxaana la sheegay in ciidamada ammaanku ay wadeen baaritaanno lagu raadinayo dadkii ka dambeeyay. Ilaa warbixinnadii ugu dambeeyay, lama xaqiijin cidda rasmiga ah ee fulisay weerarka ama urur gaar ah oo sheegtay mas’uuliyadda. Dhacdadan ayaa walaac ka abuurtay dalka Urdun, oo ay bulshooyinka Muslimiinta iyo Masiixiyiintu muddo dheer ku wada noolaayeen. Dowladda Urdun ayaa ballanqaadday in lala xisaabtami doono cid kasta oo lagu helo inay ku lug lahayd weerarka, iyadoo sidoo kale ku dhawaaqday saddex maalmood oo baroordiiq qaran ah.