Omunahambo a yashwa nondjebo kookalyamupombo moAngola

Omulumenhu weedula 35 ota mono epango lopaunamiti moshipangelo shaNandjokwe konima eshi a yashwa nondjebo vati kovakwashiwana va Angola. Oshiningwanima osha ningwa oshivike sha dja ko moAngola kombinga yokOkongo efimbo loufiku.

Nakuninga oshihakanwa oku li omunahambo ta longele mohambo yonhumba kombinga oko.

Omukulunhu wopolifi moshitukulwa shaHangwena Ottillie Kashuupulwa okwa koleka onghundana e i.

Kashuupulwa okwa ti opolifi yaNamibia oye li pyakidila nokuninga omakonakono omoule kombinga yoshikumhungu eshi.

“Onda tuma ko ovanambelewa vopolifi koshipangelo shaNandjokwe opo vaka ningile omulumenhu ou omapulapulo nelalakano lokumona ouyelele womondjila,” ta ti. Kakukutu kopolifi natango okwa popya ta ti Omaandaxa ongudu yovanafaalama ve na eehambo di li moAngola kombinga yaKongo okwa li va ya kombelewa yangoloneya waHangwena tava nyenyeta kombinga yovanahambo vavo tava hepekwa kOvaangola.

Otaku hokololwa kutya omulumenhu ou okwa ponokelwa kongudu yOvaangola ndele tave mu pula oimaliwa osho yo ongodi yaye yopeke.

Sheli kwatelela kouyelele wa dja koovene veehambo, ova hokolola tava ti, ookalyamupombo ava okwa li natango tava kendabala okuvaka ko eengobe koshiunda.

Otaku hokololwa kutya ovalumenhu vamwe okwa li tava kendabala okushinga ko eengobe omanga vamwe okwa li va ya meumbo tava pula omunahambo omaliko aye. Onghee naashi osha eta opo a yashwe nondjebo kokaoko.

Tete okwa li a tambulilwa moshipangelo shaKongo nokonima okwa tuminwa koshipangelo shaNandjokwe molwaashi okwa ya shwa a ninga oshipute sha kula.

Nicodemus Natanael ou e li omunafaalama kOkongo, okwa hokolola ta ti osho shi li ovanahambo paife otava monifwa oixuna kOvaangola ngeenge tava lifile oimuna moshilongo shavo. Okwa weda po ta ti ka shishi ashike Ovaangola ovo tava hepeke ovanahambo ashike natango moAngola omu na Ovanamibia navo tava hepeke ovanahambo.

“Oumbudi woimuna paife owa lunda moAngola osho yo keehambo odo di li moshikandjohoololo shaKongo. Keshe efiku ohatu lili eshi eengobe detu da vakwa po,”ta ti.

Okwa ti unene tuu eehambo odo di li keengamba da Angola nOkongo odo unene hadi lopotwa ovanhu tava kanifa oimuna yavo ihapu.

Natanael okwa hokolola ta ti moAngola omu na Ovanamibia ve li unganeka tava longele kumwe nOvaangola nelalakano lokuvaka po oimuna yovanhu.

Angula Pohamba ou naye e li omunafaalama kOkongo okwa hokolola ta ti onghalo yokuhe na onhele youlifilo ya wana otai nane Ovanamibia vaka life moAngola.

Okwa yelifa ta ti ovanahambo vavo otava ningilwa omahepeko moAngola ngaashi okudengwa osho yo okunyekwa omaliko avo.

Okwa pula epangelo laNamibia naAngola opo vaye meenghundafana kombinga yoshikumhungu eshi molwaashi paife osha nyika oshiponga.

–fhamalwa@nepc.com.na

The post Omunahambo a yashwa nondjebo kookalyamupombo moAngola appeared first on New Era.