Omanyakwa taa shiki oiketala mEenhana

EENHANA- Festus Ndemwiimba, Paulus Mateus na Micheal Wiliem ove li unganeka okukala tava shiki oshiketala nelalakano lokumwenyeka oshiwana osho yo okulonga okamaliwa kavo.

Ovalumenhu ava otava hangika modoolopa yEenhana ashike ohava dulu okufika ponhele keshe ngeenge va ufanwa va ka mwenyeke noshiketala. Ndemwiimba ou e li omukwateli komesho wavakwao, okwa hokolola ta ti okwa tameka omudo 2019.

Okwa ti tete okwa li ashike a shiki oshiketaka oye auke nokonima okwa ka waiminwa kuvakwao. “Onda tameka pefimbo olo handi longo onga omukeleli womaliko. Onda longifa okamaliwa oko hadi mono mondjambi yange ndele hadi lande oshiketala shange,” ta ti.

Okwa ti etameko ka kwa li lipu shaashi okwa li a yolwa kovanhu ngeenge ta ende neendingosho ta shiki oshiketala tau lwa kutya ota welele. “Omudo 2021 eshi vakwetu va waimina nge, otwa tameka nokuenda modoolopa yEenhana hatu shiki oshiketala fiyo ovanhu tave tu shiiva,” ta ti. Ndemwiimba okwa ti ngeenge tava ende tava shiki oshiketala natango ohava kala ve kwete ominghaka tava landifa. “Eshi ngo omunhu ta lande omunghaka waye fye ohatu mwenyeke hatu imbi. Ohatu mono ashike eshi ovanhu vahapu eshi va ngudumana tava tale eshi hatu mwenyeke, vo tava lande ominghaka,” ta ti.

Okwa ti paife ove na omukumo shaashi ohava ufanwa koindingili ya yooloka va ka mwenyeke oshiwana.

Okwa hokolola ta ti ongeshefa yavo yokushika oshiketaka oye va etala omauwa shaashi paifa ohava mono mo okamaliwa kokuyambidida ounona vavo.

“Otu udite etumba eshi hatu longifa ounongo wetu nelalakano lokulwifa ondjala noluhepo,” ta ti. Okwa pula moshiwana opo shi va yambidide noshimaliwa shokulanda oiketala ipe molwaashi paife oshiketala shavo osha kulupa. “Paife ohatu longo noudjuu shaashi eengodi di li koshiketala oda tokoka ko,” ta ti. Okwa kumaida ovanyasha vakwao opo va kufe ko oshihopaenenwa shiwa kuvo okukala tava longifa ounongo wavo oku li kongela oyuuyemo. *-fhamalwa@nepc.com.na *

The post Omanyakwa taa shiki oiketala mEenhana appeared first on New Era.