IZimbabwe Premier Netball League ikhumbula umuyi uMitchel

Patience Dube

I-ZIMBABWE Premier Netball League ibike ukuba iphakathi kokukhumbula ngenhlonipho amalunga ayo adlula emhlabeni ngaphambi kokuthi kuqhubekwe ngemidlalo, kusigaba sesibili seligi.

Amaqembu aphenduke enkundleni ngoMgqibelo ngemva kokuthatha ikhefu ngoNtulikazi.

Imidlalo iqalisele kundawo ezintathu, eManyame Airbase eseHarare lakuHarare District.

Eminye ibiseMidlands State University eGweru.

Kuzo zonke lezindawo abadlali, ababukeli leziphathamandla zitshengise ukuhlonipha ngokubamba umzuzu wokuthula.

Phakathi kwabadlali abakhunjuliweyo kuloMitchelle Kanogwere, ilunga le Tongogara Queens owayedlala engunozinti, owadlula emhlabeni kungozi yemota ngesikhathi amaqembu ekukhefu ekuqaleni kwenyanga.

UKanogwere wangcwatshwa eKadoma.

Bekhokhelwa ngumgcinisihlalo uRita Mnkandla, abakhokheli labadlali bePremier Netball League bahamba ukuyavalelisa omunye wabo.

“UMitchelle ubeyindodakazi, engudadewethu lomngane. Ubethandwa kakhulu futhi ubeletha injabulo kubo bonke ababesondelane laye. Wathinta impilo zabantu ngobuntu bakhe, langokuzinikela ukudlala. Inhliziyo zibuhlungu kodwa siyajabula nxa sikhumbula isikhathi silaye.

“Sikhulekela ukuthi umphefumulo wakhe uphumule ngokuthula. Sikhala ndawonye lomdeni,” kutsho uMkandla.

Abadlali batshengise ukuqina beqhubekela phambili ngemidlalo njengokwenziwa nguMitchelle.