Oshiwike shopamuthigululwakalo sha tyapulwa monooli

Aanasikola yokoosikola dha yooloka oya li ya zala ya opala, ya zala omizalo dhopamuthigululwakalo.

Kehe gumwe okwa li a zala omizalo dhomihoko dhelaka lyawo.

Aalongwa okwa li ya zala ya opala, omanga aalongi ya li ya kutha esiku moshiwike moka, nayo ya zala omizalo dhopamuthigululwakalo okusimaneka oshiwike shika.

Nena oosikola odhindji otadhi hulitha oshiwike shika nokutyapula poosikola dhawo.

Omunasikola Evi-Lydia Ningeni okwa ti, oya li ya simaneke oshiwike shomuthigululwakalo momikalo dha yooloka.

“Okuza mOmandaaha sigo Etiyali otwa li twa zala omizalo pamwe naalongi yetu. Etitatu nEtine otwa li twa tyapula iikulya yopamuthigululwakalo, omanga nena twa dhana iidhano yopamuthigululwakalo,” ta ti ngaaka.

Ta ti, aalongi yawo oye ya longo esimano lyomuthigululwakalo.

“Onda ilonga oshindji moshiwike muka. Atushe Aanamibia, tu na omihoko dhi na omithigululwakalo dha yooloka,” ta hokolola.

Ta popi ta ti, okwa tseya iikulya yopamuthigululwakalo yomihoko ngaashi Aakaprivi ya simaneka ohi yoZambezi Bream, Aakavango mboka ya simaneka omutete oshowo Aaherero mboka ya simaneka Omaere osho wo onyama. “Ta ti, onda tseya wo natango shoka sha pitikwa nenge sha indikwa momihoko dha yooloka, ano mbyoka ya talika ko onga iipwe nenge iidhila,” ta popi ngaaka.

Ningeni okwa lombwele Kundana ta ti, oshiwike shoka oye shi tyapula nawa lela, nokwa ilonga mo oshindji.

Victor Mutota ngoka ha hiti osikola kOshakati Primary okwa ti oya li ya fatululilwa kutya omuthigululwakalo ogwa simana nogu na okusimanekwa sigo aluhe. Dairy& Eggs

“Otwa longwa kutya omuthigululwakalo ogwa zi nale nogu na okusimanekwa sigo aluhe oshoka anuwa oshinima sha adhika ko nale, go kagu na okudhinwa,” ta hokolola.

Ta ti, oya li ya fatululilwa kutya omuthigululwakalo ogo omaukwatya gomihoko dhontumba, gwi ikwatelela kelaka, eitaalo, omaihumbato, iikulya, omizalo, iiyimbo nosho tuu.

Mutota ta ti okwa ilongo mo wo kutya aantu oye na okusimanekathana oshowo okutaamba uukwatya wooyakwawo.

“Oyendji oya kanitha eitaalo lyomuthigululwaka omolwa ya lamba shoka taya longwa kaakwiilongo nenge taya landula omikalo dhimwe,” ta popi ngaaka.

Namibia omuyamba pamuthigululwakalo, ngoka gu na okusimanekwa nokulandulwa komihoko adhiye.

–vkaapanda@nepc.com.na

The post Oshiwike shopamuthigululwakalo sha tyapulwa monooli appeared first on New Era.