Onooli ya taalela omuloka muwa

Ehangano olo hali tengeneke onghalo yomhepo ola tengeneka oshitopolwa shanooli tashi ka kala sha taalela omuloka wakula moule womafiku twafinda.

Ouyelele ou oweya poluhaela konima oshilandopangelo shaNamibia shalokwa oule womafiku avali twadja.

Omutengeneki wonghalo yomhepo Vilho Ndeunyema okwa yeleka kutya omata odula aa okwa teelelika yoo aka kume nombinga imwe yoshitukulwa shamaheke.

“Odula ei oya teelelika ika denge omata akola pedu shaashi oitukulwa ei oya ninga efimbo tai dengwa koupyu nenota,” Ndeunyema ta ti.

Oitukulwa ngaashi yanooli oya ninga efimbo lile tai dengwa kenota, oshoyo koupyu.

Oovene vomikunda ova kala tava longo noundju okuxupifa ovakalimo vavo noudjuu shaashi omatale neendobe okwa ninga efimbo a pwiinina.

Natango ovaninga efimbo vena ovakalimo hava kala vakalela eembelewa davo, tava lili enota , oshikukuta oshoyo omuteya noupyu.

Kashana Fillemon omukalimo wa Hangwena okwa ti voo Ohangwena ovei ama kombinga yokouninginino, oko kuhena nande eemboola dasha.

“Ohatu xupu ashike momatale, nongeenge omeva aa ha akala a lokelwamo kodula okwa kala apwiininamo, nena otuna oku mona oixuna yakula shaashi omatale neendobe oha apwiinine diva,” ta ti.

Okwa twiila kutya eyooloko pokati kavo naava vena eemboola oleli kutya voo omeva avo okwa taalela ashike ewangwadjo, inaa amwenwa ngaashi aa ha a kala eli meemboola shoo osho ha a pwiinine diva.

Ananias Akuunda okwa ti ngaashi eendobe domomudingonoko wavo oda ningile nale onata petameko la Aguste.

“Oyana oya yela ashike, nokamwiidi kakukuta oko ngaho ito monomo edu ashike loovene li limo tali liwa koimuna,” ta ti.

Ovanafaalama ava ova holola kutya ngeenge odula oya kaloka lela nawa, ota shi keva kwafa lela shaashi ova hangika havai meendjato davo moku nifwa oimuna yavo keepomba shaashi kavali vena nghee.

Ova yelifa ashike kutya enota eli inali kuma ashike oimuna yavo, ndele navo ova kumwa keemwenyo neenghono shaashi vahapu vomuvo kevena eepomba momaumbo, ohava xupile ashike meendobe odo dapwiinina, oshoyo omatale.

Ovatengeneki vonghal o yomhepo ovati yoo odula otai dulu oku kala yakula onghee ovakwashiwana nava kale ohanda, unene pomataulukilo omeva.

*[email protected] *

The post Onooli ya taalela omuloka muwa appeared first on New Era.