Omauliko giipindi ga Rundu metifa

Omauliko giipindi gondoolopa yaRundu moshitopolwa sha Kavango shokuuzilo oga tameke Etitano mehala tali ithanwa Rundu Trade Fair Centre.

Aakuthimbinga oya li ya tameke omangeshefelo gawo nenyanyu moshiindingili shoka tashi ka hula momasiku 32 gomwedhi nguka.

Nuumvo, omauliko giipindi ngoka otaga tyapulwa oshikando oshitimugoyi.

Sha ikolelelwa kuuyelele wa gandjwa kepandja lyelelo lyondoolopa yaRundu esiku ndyoka lyotango okwa li lya hili oyendji okuza kiitopolwa yi ili noyi ili, nelalakano lyokunyanyukilwa pamwe osho wo okuyambidhidhathana.

Omauliko gahugunina moRundu oga li ga gandja ompito kaauliki yiipindi oyendji yomoshitopolwa osho wo okuza kondje, mwa kwatelwa aakwiilongo.

Elelo lyondoolopa olya shanga kutya elalakano, okukokeka eliko lyondoolopa osho wo okuxwaxwameka oongeshefa mondoolopa.

Ya gwedha po kutya, omawuliko giipindi gaRundu, ompito ombwaanawa kaanangeshefa osho wo komahangano ga yooloka, okuulika uunongo niilonga osho wo okushingitha iilandandithomwa yawo.

“Iipindi mbyoka ohayi gongaleke aanangeshefa oshowo aantu ya za kokule, taya ulikilathana uunongo niilonga yawo mehala limwe,” ya ti ngaaka. Elelo olya ti nonumvo oya gongaleka aawuliki yiipindi oyendji lela okuza koombinga noombinga.

Ta li tseyitha wo kutya, elalakano okugandja ompito kaanangeshefa osho wo komahangano gu ulike iishingithomwa yawo.

“Omauliko giipindi oge na iilandithomwa ayihe okuza kiikulya, kiizalomwa na kehe shoka hashi vulu okweetwa po noonyala osho wo okweeta oombelewa hadhi gandja omayakulo ga pumba popepi,” ya nyola ngaaka. Ya gwedha po kutya, omawuliko giipindi gonuumvo oga yooloka komakwawo, oshoka oga longekidhwa naayihe yi na okukala mo. Johannes Johannes ngoka e na okatala momauliko giipindi okwa ti esiku lyotango netiyali oga enda nawa lela.

“Otatu pandula oshoka otwa landitha nawa, otwa hala omasiku ngoka ga hupa ko ga fe ngoka gotango,” ta pandula ngaaka.

*[email protected] *

The post Omauliko giipindi ga Rundu metifa appeared first on New Era.