Iran oo ka digtay saameynta dhaqaale ee dagaal cusub oo ay la gasho Mareykanka iyo Israa’iil

Nov 07 (Jowhar)-Mas’uulka ugu sarreeya hay’adda Difaaca Dadban ee Iran, Jeneraal Gholamreza Jalali, ayaa ku baaqay in la diyaariyo qorshe dhammaystiran oo lagu maareynayo dhaqaalaha dalka xilliyada xaaladaha degdegga ah, iyadoo ay sii kordhayaan walaaca laga qabo in Mareykanka iyo Israa’iil ay dib u bilaabaan tallaabooyin militari oo ka dhan ah Iran.

Jeneraal Jalali, oo hoggaamiya Hay’adda Difaaca Dadban ee Iran, ayaa sheegay in dhaqaalaha dalku yahay mid ka mid ah meelaha ugu nugul khataraha soo wajihi kara, loona baahan yahay hannaan isku-dubaridan oo lagu maareeyo xaaladaha qalalaasaha.

Sida ay baahisay wakaaladda wararka ee Fars, Jalali ayaa tilmaamay in mudnaanta koowaad ay tahay xaqiijinta baahiyaha aasaasiga ah ee shacabka, sii wadidda wax-soo-saarka dalka iyo ilaalinta shaqooyinka.

Waxa uu sidoo kale ku baaqay in si hufan loo maareeyo kheyraadka iyo awoodaha dhaqaale ee dalka, si loo ilaaliyo xasilloonida dhaqaalaha haddii ay dhacaan xaalado degdeg ah.