Tava dengwa kenota mOshikoto

Omukulunhuwiliki koshikondo shokutwala omeva komikunda mounisteli wounamapya nounaimuna Steven Taukondjele okwa koleka ta ti ololi e i hai twala omeva komikunda oya teka onghee ovakalimo moikandjohoololo ya yooloka mOshikoto otava dengwa kenota.

Okwa ti ololi paife oya ninga oivike ivali mongalashe ya teelela okupwa okupangela.

Edi Taukondjele okwe di popya onghela pefimbo a ninga eenghundafana naKundana.

Okwa koleka ta ti omukundu unene wa taalelwa omolwa oshitenda osho sha mbeshitelwa okudja kondje yoshilongo ashike fiyo onena ina shi fika.

“Onde lineekela kutya oshitenda eshi itashi kala sha fika moshivike eshi ndele omukundu tau kala wa kandulwa po,” ta ti.

Taukondjele okwa kumaida oshiwana opo shi li didimike molwaashi omukundu ou otau kala wa kandulwa po meendelelo.

Okwa hokolola ta ti ombelewa yaye otai longele kumwe nombelewa yehongo moshitukulwa shaShikoto okukala ya twala omeva keefikola nokoupangelo.

Okwa weda po ta ti ombelewa yehongo oya tameka nale okutwala omeva nololi keefikola. Taukondjele natango okwa ti, ehangano loNamwater ola yandja ololi oyo paife ya tameka okutwala omeva komikunda.

“Omikunda odihapu da pumbwa omeva. Ohatu twala omeva koikandjohoololo ngaashi Okankolo, Eengodi osho yo Nehala Lya Mpingana,” ta ti.

Okwa yelifa ta ti omwaalu womikunda odo da pumbwa omeva omuhapu unene, onghee eshi oshi li eshongo linene va taalela.

“Ohatu kendabala opo tu longe noudiniini tu kale twa mana ko omikunda dipewa omeva,” ta ti.

Okwa ti osho shi li ombelewa yaye oya didilika oshiwana tashi dengwa kenota omanga ovanhu vamwe ohava ende oshinano shile tava ka teka omeva meendungu nomomifima.

Taukondjele okwa kumaida oshiwana opo shi longife nawa eendungu nomifima molwaashi oda fimana ngeenge pe na omukundu womave.

“Ovanhu nava ta kamife ngeenge tava teke omeva meendungu opo ku keelelwe oiponga yomafyo,” ta ti.

Okwa ti ngeenge ololi oya pu okupangela otava ka twalwa tete omeva keefikola osho yo koupangelo molwaashi eenhele odo oda fimana.

Kansela woshikandjohoololo Eengodi, Saara Shikolola okwa ti ovanhu otava mono oixuna moshikandjhoololo shaye molwokuhe na omeva.

“Ngeenge owai komifina neendungu oto hange ko ovanhu ve li momikweyo diledile va teelela okuteka omeva,” ta ti.

Kansela woshikandjohoololo shaKankolo, Esala Ndaamekele okwa ti ovanhu ovamwe ohava nu omeva alula a tekwa meendungu.

“Otwa pandula epangelo eshi la ninga eenghendabala dokulongifa ololi ya Namwater okutwala omeva koshiwana ashike natango onghee nga kuna omikunda dimwe da xupa ko tadi dengwa kenota,” ta ti.

–fhamalwa@nepc.com.na

The post Tava dengwa kenota mOshikoto appeared first on New Era.